WILLEMSTAD.- Den presensia di Minister Presidènt, Minister di Desaroyo Ekonómiko i demas invitado,‘The Coca- Cola Company’ i Curaçao Beverage Bottling Company (CBBC), ta selebrá 80 aniversario na Kòrsou ku un donashon di $200.000,00 (Nafl. 359.090,-) na GreenKidz Foundation i GreenForce Foundation. Esaki komo parti di e plan global ‘World Without Waste’ pa yuda krea un mundu sin sushedat, ku a ser anunsiá na inisio di e aña aki.

Miéntras empake di produkto ta un aspekto importante di nos bida moderno, e sistema aki ta okashoná un problema i sushedat pa nos medio ambiente, Coca- Cola, igual na tur kompania, tin e responsabilidat pa yuda solushoná esaki. Ku e vishon aktual ‘World Without Waste’ Coca- Cola ta invertí den planeta i empaketamentu pa kontribuí pa hasi e problema aki algu di pasado. E meta ta pa na aña 2030 kolektá i resiklá un bòter òf bleki pa kada un ku ser bendí mundialmente. Pa alkansá e meta aki, e kompania ta kontinuá ku nan esfuersonan pa hasi 100% di nan empake resiklabel rònt mundu.
“Mundu tin un problema di empake, i manera tur kompania nos deber ta  pa yuda solushoná esaki” ta palabranan di James Quincey, Presidente i Direktor di ‘The Coca- Cola Company’.
“Pa medio di nos vishon ‘World Without Waste’ nos ta invertí den nos planeta i nos empake pa pone e problema aki tras di lomba”
Pa por alkansá e meta stipulá pa aña 2030, CBBC a uni forsa ku GreenKidz pa eduká 3.000 hóben i ku GreenForce pa krea un planta ku tin e kapasidat pa eksportá tur sushi resiklá.
GreenKidz Foundation a risibí $50.000,00. Sra. Maya Matthias presidente di GreenKidz Foundation a aseptá e donashon ku gran entusiasmo komprometé pa eduká e hóbennan pa tin un ‘mentalidat bèrdè’.

Na su turno el a enfatisá riba e importansia di kolaborashon ku tur skol, Gobièrnu i demas ‘stakeholder’.
Fundashon GreenForce  a risibí un donashon di $150.000,00 pa kontribuí na e meta pa remové tur bòter plástiko posibel for di riba Kòrsou.

Na momentu ku China a kambia su pólisa pa ku aseptashon material plástiko internashonalmente, GreenForce a pèrdè su lokalidat pa eksportá. Ku e kontaktonan di CBBC a logra pa haña un kumpradó. No opstante di esaki e kompania aki ta eksigí un forma diferente pa prosesá e bòternan aki. Pa e kumpli ku esaki un planta mas sofistiká ta nesesario.
E donashon di Coca- Cola ta netamente pa kompra di diferente ekipo pa e ekipá e fundashon pa e montante kresiente di material resiklá. Den un futuro hopi serkano lo tin un oumento  pa ku  puntonan di kolekta.
Durante e rueda di prensa, e Gerente di Benta i Merkadeo sra. Myrthe George-Verhulst a informá tur invitado di e kambionan ku lo bai tin den produkshon di produkto di e kompania lokalmente. Pa final di e aña aki  tur bòter di plástiko ku CBBC ta produsí lo ta kontené 25% di material resiklá. Pa e tempu aki tur bòter di 20 oz (Fria, Coco-Rico i Criollita) lo tin ménos peso. Hasiendo esaki ménos plástiko ta keda usá komo parti di e meta pa rediseñá di ‘World Without Waste'. Na 2019 CBBC lo pasa pa un “short cap” esaki tambe ta nifiká ménos plástiko pa e empake den su totalidat. “Nos awa Dasani ya kaba ta di peso liviano i e empake ta konta ku 30% di produktonan di nos propio tera” sra. George- Verhulst a añadí.
Un donashon ku suma di $200.000,00 pa GreenKidz i GreenForce pa eduká 3.000 hóben i pa invertí den un planta pa resiklá ta marka un bunita logro pa selebrá e 80 aniversario di Coca- Cola na Kòrsou. Koperashon entre CBBC i e dos fundashonnan lo ta pa duna aporte pa alkansá e meta pa  krea “World Without Waste’, un mundu sin sushedat.