WILLEMSTAD.- Kòrsou a proba na 2019 di ta birando mas i mas ménos sigurá pa loke ta tráfiko. Kompará ku e añanan anterior, 2019 tin muchu mas aksidente den tráfiko. Asta por papia di un oumento di 50 porshento mas aksidente den tráfiko ku herido. Di 13 mil aksidente registrá na 2018, 4455 tabatin hende herida i 17 morto. Un oumento manera nos a bisa kaba preokupante. Na 2018 tabatin 2928 hende herida ku ta un diferensia di 1527.

Segun rapòrt di Forensys, tur luna nan ta registrá entre mil pa 1200 insidente ku vehíkulonan motorisá den tráfiko, sigur 35 pa dia. 13031 aksidente di tráfiko den 2019 ku ta 86 mas aksidente ku na 2018 pero kompará ku  2014 nos por papia di algu mas ku 17 mil aksidente. Tres kuart di e aksidentenan tabata envolví 2 vehíkulo. I den kaso di 10% ta envolví asta 3 òf mas vehíkulo.

Kompania di seguro

20.837 partido tabata envolví den 13 mil informe di daño/aksidente. Na 2018 esaki tabata 21553. E kantidat total di asegurado na Kòrsou a oumentá ku 2107 pa 92035. Kasi un kuart tabata envolví den un informe di daño òf aksidente na 2019.

E mihó shofùrnan, meskos ku na 2018 ta sigurá na Inter Assure. Di e kasi 3500 asegurado, algu mas ku 16% tabata envolví den un reporte di daño di kual apénas 8.9 tabata responsabel.

Tradishonalmente New India tin e kantidat mas grandi di fragmento den su base di kliente, i e aña aki tambe esei ta e kaso. Mas di 35 porshento di su klientenan ta reklamá nan seguro di kual 18% tabata responsabel pa daño.

E kompanianan di seguro di mas grandi ta Guardian i Ennia., Guardian tin 24 mil asegurado i Ennia algu mas ku 19 mil. Den 40 porshento di tur aksidente ta e dosnan ei su kliente ta envolví. E dos kompanianan ei su partisipashon den merkado a baha ku 3% kompará ku 2018.

Morto i herido

Den 13031 aksidente aña pasa tabatin 4455 hende herida i 17 morto (un ménos ku 2018). Esaki ta nifiká ku den 21% di aksidentenan lo tabatin mester di un òf mas ambulans. E oumento den e kaso ei ta enorme i preokupante kompará ku 2018 ku 2928 hende herida. Kasi 50% mas víktima den 86 ménos aksidente.

Tambe e rapòrt ta menshoná ku luna di mei aña pasa ta esun kaminda a registrá mas aksidente (459) pero mayoria morto den tráfiko tabata den luna di desèmber (6 total). Kompará ku 2018 tambe por a ripara ku ta den luna di desèmber tabatin mas morto den tráfiko.

Edat i género

Esnan ku mas a kousa aksidente ta hóbennan entre 18 pa 25 aña, ku huntu ta 15% di e kantidat total di aksidentenan, meskos ku na 2018. E porsentahe ei no ta baha asina signifikante entre 26 i 35 aña. Den 22% di aksidentenan e shofùr ta 26 pa 35 aña. Ta despues di esei e sifra ta baha pero despues ku un oumento espantoso di 121% entre 46 i 50 aña.

Pa loke ta e género por menshoná ku 59% di esnan envolví den aksidente ta hende hòmber i hende muhé 37%. E sifranan aki ta igual ku na 2018.