For di awe 2 hende pa famia por bai hasi kompra

WILLEMSTAD.-Kòrsou tin 57 kaso total di Covid di kua 21 ta kasonan aktivo. Di e kantidat aki 35 a rekuperá. Manera indiká Kòrsou tin 4 kaso nobo di Covid-19, asina dr. Izzy Gerstenbluth a informá komunidat awe.

Gerstenbluth a splika ku unu di e kasonan nobo tin un lenk na otro kaso positivo ku ta identifiká kaba. Pa loke ta trata e otro tres kasonan si ta investigando ainda su orígen. Mas aleu el a duna di konosé ku awor ku tin plamamentu lokal di e vírus ta importante ku mester detektá i isolá e kasonan. Ta test mas tantu hende ku ta den serkania di unu ku a test positivo pa asina por isolá nan for di otro hendenan. Miéntras ku ta sigui test i ta topa ku mas kaso no ta motibu pa spanta, pasobra ta esaki ta e meta di e aktuashon aki. Ta den kaso ku no por determiná e fuente ta motibu di prekupashon.

E komunidat aki tin obligashon di protehá mayornan i hendenan di edat avansá pasobra esei ta e grupo di riesgo. Pa e motibu ei ta importante pa ora ku hende mas hóben mester bai karentena ku nan mester tene nan mes na regla di distansia sosial i regla di higiena.

Maharo Isenia di e direktorado di informashon di gobièrnu di Kòrsou a informá ku for di awe ta dos hende di kada kas por bai hasi kompra na supermerkado i no por sinta kome ni bebe na toko ni minimarket mas. Pa mantené nos mes na reglanan di higiena, kada hende mes mester yena suma riba e mashin di swaip tur kaminda i asina evitá posibilidat di transmishon di e vírus. Ademas mester limpia e mashin di swaip despues di kada uso. Mas detaye den edishon di EXTRA.