KRALENDIJK.- Un hòmber a presentá dilanti wes awe den korte na Boneiru, riba akusashon di posishon di arma di kandela. Tabata durante di un kontròl ku a bin topa e hòmber ku e arma di kandela den su tas. Tambe e tabatin un kantidat di droga huntu kuné. Aña pasá na Boneiru, Saba i St. Eustatius tabatin un akshon kaminda por a entregá arma di kandela ilegal sin persekushon pa e persona ku entregá esaki, basta no a kometé ningun echo kastigabel ku e arma. E sospechoso a deklará ku durante di e akshon aki, pa entrega arma boluntario, ya kaba e tabatin e arma pero e no a hasi uso di e posibilidat aki. Mientrastantu e periodo pa entregá arma a vense. Debí ku e sospechoso no a hasi uso di e oportunidat pa entregá e arma, fiskal a demandá un kastigu di prizòn di 24 luna di kual 6 kondishonal. Wes a sentensiá e sospechoso na un kastigu di prizòn di 21 luna di kual 6 luna kondishonal i un periodo di prueba di 3 aña.