Minister Plenipotensiario pa Kòrsou na Ulanda Anthony Begina a pone algun ora disponibel pa nos di EXTRA, na kas di Kòrsou na Ulanda pa algun notisia masha alentador pa Kòrsou.

Kiko ta trabou di minister plenipotensiario

Kas di Kòrsou ta un tim, el a enfatisá. Kas di Kòrsou ta un parti di gobièrnu di Kòrsou i ta representá gobièrnu di Kòrsou na Ulanda. E ta representá minister presidente na Ulanda i den Rijksminister raad. Tambe e ta representá Kòrsou. Esei ta e funshon di Kas di Kòrsou. Banda di esei ku su yegada na Ulanda, el a e mensahe bon kla di promé minister di Kòrsou ku e no ke un minister plenipotensiario ku ta traha solamente riba instrukshon. E minister plenipotensiario mester tin un ròl tiki mas liber kompará ku den pasado. I ku esei den mente segun sr. Begina nan a traha un plan di kiko ke ku Kas di Kòrsou. Na promé lugá kara di Kòrsou na Ulanda no tabata asina bon. I esei nan kier a establesé i drech’e. Despues di un aña i mei nan a logra hopi.

E otro parti ta ku nan ke tin mihó kontakto ku e yunan di Kòrsou na Ulanda i esei tambe nan a logra. Nan a logra mas kontakto ku profeshonalnan i tur grupo na Ulanda. I no ta kla ainda.

E di tres parti ku nan kier  a logra ta e parti di polítika. Kon ta aserka e polítika ulandes mas mihó ku bo ta un faktor importante i ku bo stèm ta keda skucha tambe. Minister Begina a splika Djasabra ku ku nan ta logrando tambe pa Kòrsou su stèm ta skucha

Invershonistanan riba kaminda pa Kòrsou

I un parti masha prinsipal ku nan ta haña ta ku nan mester aportá na loke Kòrsou tin mester. I Kòrsou mester di hopi aktividat ekonómiko. I den e kuadro aki nan tin un trahadó den e sektor di ekonomia i lo pone 2 mas aserka pa atraé komersio pa invertí na Kòrsou. I el a resultá den algun akshon figo optené kaba i aña pasá na yüni tabatin e  promé kongreso di invershon na Ulanda kaminda minister presidente Rutte i Rhuggenaath tabatei. A organisá un summit masha bon bishitá. I e di dos fase di esei lo bai tuma lugá dia 21 i 22 di yanüari na Kòrsou. E ta nifiká ku lo bai algun empresa masha importante di Ulanda pa Kòrsou. Ya tin 40 pa 50 empresa inskribí i e lo bira algu grandi. Minister presidente Rutte lo bai Kòrsou promé kaminda e lo keda risibí pa promé minister Rhuggenaath. E enkuentronan lo dura mas òf ménos un siman i tur e empresanan interesá a komprometé nan mes ku Kòrsou. E perspektivanan ta grandi.

Kòrsou ta logrando

Na mart 14 i 15 lo tin un global entrepeneurs summit ku tambe ta algu grandi. Dia presidente Rutte tabata na Merka, presidente merikano Donald Trump a regal’é un enkuentro kaminda míles di kompania merikano lo tuma parti na dje. I e enkuentro entre minister Rhuggenaath i embahador di Merka na Ulanda a pensa pa organisá un pre summit na Kòrsou i esei ta tuma lugá dianan 14 i 15 di mart aki na Kòrsou. Tur esakinan ta demostrá ku Kòrsou ta logrando pa yega na nan plan, aportando na mas trabou i mas entrada pa gobièrnu.

No manera ántes

Kas di Kòrsou no ta manera e Kas di Kòrsou di ántes. Riba tur e 4 puntonan menshoná nan ta logrando i ta hasiendo hopi trabou. Pa loke ta e yu di Kòrsou na Ulanda, sr. Begina a bisa ku nan ke ta mas envolví pero no tin hopi hende i no por hasi tur kos. Nan ta buskando kontakto ku tur e profeshonalnan hóben. Nan ke sa kuantu profeshonal hóben tin ta biba na Ulanda. E idea ku bo mester ta na Kòrsou pa aportá na Kòrsou ta algu di ántes. Bo por biba na Ulanda i aportá na Kòrsou. I esei ta loke tambe Kas di Kòrsou ta hasiendo, esta buska e profeshonalnan i usa nan na Kòrsou. I den e kuadro aki a forma Denk Tank i eseinan tambe Kas di Kòrsou tambe ta organisando.

Kas di Kòrsou no ta un embahada

Splikando mas aleu di e trabounan di Kas di Kòrsou, señor Anthony Begina a splika ku Kas di Kòrsou no ta un embahada kaminda si e yu di Kòrsou tin problema ta yega einan pa su problemanan keda solushoná. E ta poko difísil segun sr. Begina Kas di Kòrsou ta na Den Haag i pa e otro siudatnan yega einan ta difísil. Kas di Kòrsou no ta pa problema pasobra tur yu di Kòrsou ku yega Ulanda i inskribí ta kai direktamente bou di nan munisipio. Ta asina Ulanda ta organisá i “nos no por pretendé di por yuda hende riba e terenonan ei. No por laga un hende stèns riba bo ku bo por yud’é”, señor Begina a enfatisá.  Nan no por duna ayudo na e hende individual ku ta yega Ulanda.

Destakando

Na Kòrsou por tende mas tantu di e yu di Kòrsou ku hasi algu negativo pero segun sr. Begina, na Ulanda tin masha hopi yu di Kòrsou ku ta hasiendo trabounan positivo. Kòrsou tin 160 mil habitante i na Kòrsou 120 mil i si mira kuantu hóben ta hunga den divishon, artistanan grandi, “Nos ta destakando masha bon i na nivel di mas haltu ku bo por imaginá bu. Mi ta papiando di artista i deportista pero si mira kuantu profeshonal nos tin ta kana bai bin i hasiendo trabounan importante. Aparte di esei tin un tiki problema ku nos hendenan pero ta un parti masha chikí”, sr. Begina a enfatisá.

Kosecha

Kas di Kòrsou tin su revista kual nan punto di akshon prinsipal ta kon por trese aktividatnan ekonómiko na Kòrsou. I banda di dje e bon nan di Kòrsou i nos hendenan. Por mira eksperensia di empresanan. E hendenan den e revista ta komprometé i nan gusta Kòrsou. 2019/2020 lo bira grandioso segun sr. Begina. Tur e hendenan pesimista lo mira kiko lo bira na Kòrsou. Awor kisas kos no ta bon pero si mira aktividatnan i invershonnan na kaminda no por ta otro ku Kòrsou lo bai kosechá.

Orguyoso

Sr. Begina ta sumamente orguyoso di loke e tim di Kas di Kòrsou ta logrando. E tim ta dirigí pa minister Rhuggenaath aki na Kòrsou. “Sintando ketu nada ta bin serka bo. Bo mester ta riba kaya konstante pa buska porvenir pa bo pais. Ora kosnan logra mi ta kontentu. I mi ta kontentu ku kosnan ta bayendo den hopi bon direkshon”, sr. Begina a enfatisá.

Aña eksitoso

2019 lo bira aña eksitoso. Lo bai tin na Kòrsou algun aktividat grandi, lo bin hopi bishitante ku ke invertí na Kòrsou i nos mester para ku man habrí pa risibí nan positivamente i for di esei nos tur na Kòrsou lo probechá di loke ta bini.