WILLEMSTAD.- Di dia kla narkotrafikantenan ta trata di drenta nos isla ku droga.
Ayera e Cutter Jaguar di Wardakosta ta interseptá boto ku tres hende hòmber riba laman
Den oranan di ayera mainta e Sentro di Reskate i Kordinashon (RCC) di Wardakosta a detektá un boto ku tabata nabegando direkshon di Kòrsou. Mesora RCC a dirigí e patruya di Jaguar ku tabata riba laman na e lokalidat di e boto sospechoso.
Tambe a pidi Kuerpo Polisial di Kòrsou nan asistensia pa motibu ku e boto tabata nabegando hopi serka di kosta. Na yegada na e sitio polis a enkontrá kuater pakete i un tas den mondi.
Riba laman e cutter Jaguar a detené e boto tipo yola ku tres hende hòmber na bordo ku tabata nabegando direkshon di sùit.
E tres hòmbernan, di kual dos kolombiano i un venezolano a ser entregá na polis pa sigui ku mas investigashon.
Polis a konfiská e kuater paketenan ku ta kontené mas o ménos 217 kilo di mariwana pa por hasi investigashon di e kaso.