Boneiru ta bai den ‘lockdown’ suave

WILLEMSTAD.-E informashon ofisial pa loke ta trata kasonan di Covid-19 ta mustra ku pa awe 20 di sèptèmber tin 21 kaso nobo. E informashon ta bisa mas aleu ku di e 21 kasonan nobo, 20 ta kasonan liga na kasonan eksistente i tin un kaso ku su fuente no ta konosí ainda. Tin un persona ku a keda interná den hospital. Den mesun rosea ta bon pa bisa ku tin 8 kaso ku tabata positivo i ku a rekuperá.

E sifranan total for di mart ta mustra ku tin 268 kaso di kua 171 aktivo i 96 a rekuperá.

Un bista na hermana isla Boneiru por mira ku den un diskurso nashonal gezaghebber Edison Rijna a anunsiá e kasonan nobo i a duna di konosé ku el a hasi petishon na outoridatnan na Ulanda pa Boneiru tambe dekretá kódigo oraño. Esei ta enserá ku Boneiru lo por stòp di tuma turista for di Ulanda pa e tempunan aki.

Te ku ayera Boneiru tabatin 16 kaso nobo di Covid-19. Segun gezaghebber Rijna esei ta nifiká ku Boneiru a drenta un fase nobo ku mester tuma medidanan mas estrikto. Esaki ta nesesario pa evitá ku e vírus ta sigui plama. Tin medidanan di ‘lockdown’ suave ta drenta na vigor awe djadumingu 12’or anochi.

E medidanan ta enserá; tene distansia , stimulá trahamentu for di kas, ta sera establesimentunan di kome i bebe, solamente ‘take away’ ta posibel anto te 10’or di anochi. Ta sera tur establesimentu ku ta ehersé trabou òf servisio ku kontakto direkto manera pelukeria, estilista di una etc. Ta sera tur fasilidat di deporte i ta permití deporte ku tin poko kontakto i ku ta den aire liber so, anto sin públiko.

Ta permití seremonia di kasamentu pero sin invitado i entiero ku máksimo di 10 persona den sala di despedida. Mas detaye den edishon di EXTRA.