WILLEMSTAD – Fiskal a kaba di pidi un demanda di 22 aña di prizòn pa e dos hóbennan A. Hodge i S. Nocento, ámbos akusá pa e tiroteo ku a tuma lugá dia 3 di yüli último den kaya Beròm. E tiroteo a kosta bida di Trevor Welvaart di apénas 18 aña.

Dia 3 di yüli, Sentral di Polis a risibí yamada di un kaso di tiramentu ku a tuma lugá den Kaya Beròm i tin un persona heridá. Polis ku a yega na e sitio a topa un hòmber drumí abou ku herida di bala na e parti ariba di su kurpa i no tabata duna señal di bida.

Ambulans ku a yega na e sitio, ya no por a hasi nada mas pa e víktima. Dòkter di polis a konstatá morto di e hòmber Trevor Welvaart, nasé na Kòrsou dia 18 di òktober 2002.

For di investigashon preliminar a sali na kla ku e víktima tabata serka algun persona den e kaya ei, na momentu ku un òf mas persona a pasa i lòs tirunan dirigí, ku a alkans’é na e parti ariba di su kurpa. Ayera niun di dos akusado a hiba palabra.

Den edishon di EXTRA mayan lo tin un relato amplio di e kaso aki den Korte awe