WILLEMSTAD.- Un biaha mas CURA DOET tabata grandi. P’esei Curaçao Cares por wak bèk riba un di 4 edishon eksitoso di CURA DOET.

Un biaha mas organisashonnan a duna orea na e yamada pa partisipá, i e aña aki 40 organisashon nobo a partisipá. Un total di 236 proyekto a tuma lugá e wikènt aki. Mayoria tarea i aktividat, mas o ménos 176, a tuma lugá riba djasabra. Míles di boluntario, den nan hopi kompania i gruponan di skol, di deporte i hopi famia a duna un man. Grandi ta e gratitut di tur e organisashonnan ku a haña un yudansa inmenso.

E promé tareanan a ranka sali djabièrnè mainta fo’i 7 di mainta i gran parti di e trabou a kulminá djasabra atardi banda di 6 or di atardi. Mas ku 35 skol a partisipá pa por a duna nan skol un kara nobo i e resultadonan sigur lo sorprendé muchanan ora nan yega djaluna. Algun organisashon a hasi uso di e oportunidat pa drecha nan vèlt di futbòl i sòftbòl manera Victory Boys i SV Pichingolo.

E aña aki por a mira kresementu den e grupo i kasnan di grandinan ku kier a organisá un dia spesial pa nan miembro I klientenan.

Tabatin diferente proyekto pa traha “greenhouse” pa mucha i grandi entre otro na Schotborghschool na Koraalspecht ku yudansa di Albertschweitzerschool i GreenKidz i na Kas pa grandi Nos Lanterno ku sosten di StènkiBusters i Selikor N.V. Manera tur aña hopi kompania tambe a partisipá masal i a sa di kontribuí ku rekurso humano i finansiero na diferente kaminda.

E organisashon di CURA DOET, den man di Curaçao Cares i Oranjefonds ku sosten di Reda Sosial, ta sumamente kontentu ku tur e resultadonan i ku tantu boluntario i organisashonnan por a haña chèns di traha huntu.

Segun Deva-Dee Siliee, di Curaçao Cares, “Djabièrnè tabata sigur un komienso spesial ku presensia i partisipashon di Prinses Laurentien di Ulanda na Governeur Laufferschool i Gabinete di Gobernador na Kas Hugenholtz, i djasabra e kulminashon mes ku 176 proyekto total. E aña aki banda di nos tim, nos tabatin kordinadónan ku a kore rònt Kòrsou i kada unu a bini bèk ku historianan positivo i videonan ku nos lo sigui estrená riba nos página di FB den simannan benidero.” “E reakshonnan ta indiká ku atrobe CURA DOET tabata dos dia ekstraordinario pa personanan di tur edat i ku tur hende ku partisipá ta gosa di e eksperensiá di por duna bèk i nifiká algu pa nan komunidat. I e sintimentu ei ta presisamente lokual nos di Curaçao Cares kier kultivá,” segun Janis Vinck lider di proyekto.

Lamentablemente tabatin algun organisashon ku no a haña boluntarionan nobo òf a plania pa mas hende i al final ménos hende a bini.

E kantidat di boluntarionan ta ménos kompará ku añanan anterior i esei por tin di aber ku e fecha mas trempan i nèt despues di Karnaval i sierto akontesimentunan riba  nos isla. Huntu lo bai wak kon pa sigui traha riba e parti di komunikashon i preparashon. Pero gran mayoria di proyekto a kana sublime.

Curaçao Cares kier yama pueblo di Kòrsou kompletu pabien ku e dos dianan positivo aki kaminda a hasi di Kurason i logra hopi huntu”. Pabien Kòrsou!