Despues ku hinter siman a papia di e instituto i nòmber di direktor

 WILLEMSTAD/ PHILIPSBURG.- Hunta di komisario di Banko Sentral di Kòrsou i St.Maarten a reuní resientemente relashoná ku e diskushon públiko ku a surgi riba informashon di e kandidato pa minister sra. Neysa Schoop-Isenia. Manera ta konosí un dokumentu konfidensial ku informashon detayá di sra. Schoop-Isenia a sali di Banko Sentral pa minister di finansa. Manera e minister di finansa mes a deklará públikamente, el a kompartí e informashon konfidensial aki ku sra. Schoop-Isenia pa asina e por defendé su mas ora e momentu yega.

Hunta di komisario a keda sumamente preokupá pa tur e informashonnan ku tabata sirkulá. Riba retnan sosial, den seno polítiko i otronan tabatin mustramentu di dede riba direktor sra. Leila Matroos-Lasten.

...Riba e foto por mira sra. Leila Matroos Lasten, José Jardim i president komisario Etienne Ys...

Den un informe ofisial Banko Sentral ta informá ku e hunta di komisario a disidí na kuminsá un investigashon  independiente pa trese na klaridat tur asuntu ku ta importante den e kaso aki. E hunta ta spera di por usa e echonan ku Sali for di e investigashon pa yega na e konklushonnan i tambe tuma posibel medidanan ku por ta nesesario.