WILLEMSTAD.- 24-7 Taxi Curaçao su meta ta pa bai ofresé un servisio “A1” na su klientenan aki na Kòrsou. Den e tempu moderno aki, tin hopi hende ku ya sa kiko ta e konsepto nobo di e servisio di taksi. Hopi di nos konosé e servisio multinashonal Uber. Aki na Kòrsou lo bai tin esei for di awor, aunke un poko mas mihó. Esei di akuerdo ku sr. Jeroen Kibbelaar, direktor di Securitas Antias 24-7 ku ta kompania ku a djòin e organisashon di taksista 30 Steps Association pa lanta “24-7 Taxi Curaçao” (TSA).

Den su presentashon sr. Kibbelaar a trese dilanti mas aleu ku na momentu ku a sinta ku TSA pa yega na e konsepto di taksi aki a pensa riba algun punto ku ta esensial:

• 
  

• Bon servisio

• 
  

• Servisio di 24 ora 7 dia pa siman

• 
  

• Servisio konfiabel

• 
  

• Disponibel tur ora

• 
  

• Sistema di komunikashon sofistiká

• 
  

• Start ku un grupo grandi di taksista

• 
  

• Lanta un sentral.

• 
  

E struktura dje organisashon aki ta ser yamá “24-7 Taxi Curaçao”. TSA ta esun ku lo sòru pa tur taksi ya ku nan ta esnan ku tin  e lisensia, miéntras ku 24-7 lo proveé e software i e plataforma pa hasi komunikashon i e parti di merkadeo. E kompania nobo aki lo bai start ku 45 taksi, segun sr. Kibbelaar.

Mas aleu el a splika kon un kliente lo por reservá un taksi. Esaki lo por ser hasí na e sistema konvenshonal, pues hasiendo un yamada telefóniko (9-24-7) na e sentral. E mesun sentral aki ta ofresiendo servisio na e kompania di seguridat Securitas i tambe Wegenwacht 24-7. Tambe e kompania tin un app pa sistemanan di Android i iPhone. Tin un app ku kualke persona lo por download ki ora ku e ke. E servisio di e sentral aki ta duna ta múltiple, pa hasi kontakto ku hotèl. Finalmente tin e loke nan ta yama e “taxi butler”, ku ta un aparato chikí ku e kliente ta primi i di forma inmediato lo despachá un taksi kaminda e ta.

Reservashonnan lo por hasí den kuestion di 30 minüt i asta hasi reservashonnan di término largu. Lo por reserva a base di e kantidat total di pasahero, e kantidat di ekipahe. Loke ta hopi importante ta ku 24-7 Taxi Curaçao ta operá i kobra tarifanan fiho a base di e distansia di mas kòrtiku di punto-A pa punto-B.

E tarifa lo keda meskos den kaso ku e taksista opta pa kue otro ruta pa e kliente por yega mas lihé. Pues esei ta algu importante ku e kliente sa kiko e por spera dje servisio en kuestion. Por sierto, e tarifanan ta di akuerdo ku kalkulashonnan i fórmula apliká dor di e Ministerio pa Desaroyo Ekonómiko (MEO). Es mas, maske e kliente tarda un tiki na kaminda pa motibu di aksidente riba kaminda etc., e preis lo keda igual.

A base di e lokashon ku e kliente tin dje taksi e lo por wak pa sa kon leu e ta i kalkulá su tempu di yegada i asta e nòmber dje shofùr. Tambe sr. Kibbelaar a presentá e página wèp ku por haña akseso na dje via di www.247taxi.cw i aki lo por download e app òf reservá un taksi mesora.