WILLEMSTAD.- Fiskal Out ayera a hasi un demanda  di 24 luna pa e akusado Rutger Hasenbosch (37) nasé na Ulanda, akusá di a kousa aksidente ku morto dia 6 di ougùstùs aña pasá  na altura di Fontein.

Riba e dia en kuestion Kòrsou a registrá su di dies morto pa aña 2018 despues ku un hòmber turista a pèrdè su bida durante di e aksidente di tráfiko, ku a tuma lugá den área di Bándabou.

Segun fiskal, na momento ku e promé agentenan a yega na e sitio, nan a konstatá “dood door schuld” i ku e akusado tabata bou di influensia di alkohòl.

E akusado a bisa ku e mes no ta kòrda nada di loke a pasa.

El a akseptá di a bebe 4 ora promé ku e aksidente, pero no ta kòrda kuantu ni kon largu e tabata bebe.

Durante rekisitorio, fiskal a relatá entre  otro ku a kaba di ofisialisá e aparato di supla pa kontrolá e kantidat di alkohòl durante kontròl meskos ku na Ulanda mirando ku e asuntu di kore outo bou di influensia di alkohòl ta algu serio aki na Kòrsou.

Fiskal a haña e akusashon kompletamente probá i a tuma e akusado hopi na malu di a kore su vehíkulo  bou di influensia di alkohòl.

Mr Athena Sulvaran ku a hiba e defensa a duna di konos’é ku no por usa e resultado di sanger pasó no a sigui e prosedura di lei manera mester ta.

E abogado a pidi e loke ta keda yamá “strafmaatverweer” pa motibu ku e petishon di fiskal ta hopi mas haltu ku normal.

E abogado a rechasá entre otro ku fiskal a kue e kaso di e akusado komo ehèmpel di e komunidat i ignorá e kastigu ku normalmente korte sa duna pa tipo di kasonan asin’aki.

El a bisa ku pa esaki mester tin mas kos ku a bai robes  manera ekseso di velosidat, kore outo den un forma iresponsabel òf peligroso.

E abogado ta di opinion ku alkohòl so no ta sufisiente pa bisa ku e persona a aktua asina deskuidá den tráfiko, ku ta kategorisá su kulpa den un di e kategorianan di mas haltu, mirando ku nos kódigo penal konosé tur diferente nivel di kulpa.

Segun e abogado, e kastigunan ku ta keda pidí normalmente den tipo di kasonan ku morto den tráfiko kaminda tin uso di alkohòl, ta entre 7 luna i 4 aña.

E abogado a splika ku e 7 lunanan ta pa kasonan ku tin konsentrashon haltu di alkohòl den sanger, sin ku por proba ku e shofùr a kometé mas infrakshon den tráfiko.

Mas aleu e abogado a bisa ku ta ora tin kombinashon di mas infrakshon den tráfiko di parti e shofùr, tumando  tur kos na konsiderashon, e ora ei por papia di subi kastigu.

Pero e abogado a bisa ku den e kaso aki no tin indikashon ku e akusado a kore ni duru ni peligroso.

Solamente tabatin alkohòl den su sistema.

Mr Sulvaran mas aleu, a duna diferente ehèmpel kaminda tabatin kombinashon di uso di alkohòl, koka, ekseso di velosidat, den bògt, pasa outo  diferente biaha  di un manera iresponsabel i peligroso i tòg korte a duna kastigu mas abou di loke fiskal a pidi.

El a bisa ku riba esaki despues di algun siman e akusado a pèrdè su mama. E abogado a duna di konos’é ku e akusado mester bai siña biba ku e kulpa aki pa restu di su bida.  E abogado ta di opinion ku su kliente mester wòrdu apsolvé di tur kulpa  parsialmente.

Hues lo tuma desishon dia 17 di aprel próksimo.