WILLEMSTAD.- Ayera for di 9 or di mainta te 6 or di atardi partidonan polítiko por a entregá nan lista di kandidatonan na WTC. Den total 24 partido realmente a hasi esei. E aña aki entrega di lista tabata den un esfera kompletamente otro ku normal. Debí na e reglanan di COVID-19 no mas ku tres persona di kada partido por a drenta WTC pa entregá e lista. Normalmente partidonan ta bin ku hopi mas hende i tambe hopi mas folklor. Pero debí na pandemia di COVID-19 tur kos ta otro. E promé partido ku a entregá lista tabata Kòrsou un Munisipio Ulandes Nobo (KUMUN) ku lider di partido Luigi Faneyte. Siguí dor di partido Kòrsou di Nos Tur (KDNT) ku lider di partido Miro ‘Amparo’ dos Santos, Pueblo Soberano (PS) ku lider Ben Whiteman, Partido Klaridat Akshon Sosial (KAS) ku lider di partido Humphrey Davelaar i Partido Alternativa Real (PAR) ku lider Eugene Rhuggenaath.
Siguiente riba e lista tabata Liberalismo Klásiko Komunidat di Kòrsou ku lider di partido Josefina Josepha. Pero lider di e partido, sra. Josefina Josepha, no a bin WTC ayera. Ku ta nifiká ku entrega di lista no a tuma lugá i e partido no por partisipá na e siguiente elekshon. E siguiente partido riba lista tabata Partido Movementu un Pueblo pa Progreso ku lider di partido Marco Tyrol, siguí dor di partido Kòrsou Esun Mihó (KEM) di Michelangelo ‘Lo’ Martines i Partido Aliansa Nobo (PAN) di lider di partido Amado ‘Broertje’ Rojer. Siguiente riba lista tabata Partido Polítiko Kunukero ku lider Edward Koeiman, mihó konosé komo Rasta Moses. Rasta Moses a ninga di kita su tapa kara. Pa e motibu ei no por a kontrolá su identidat. Koeiman no por a entregá su lista di kandidatonan.
E siguiente partido ku a entregá lista tabata Partido Movementu Progresivo (MP) ku lider di partido Marilyn Moses, siguí pa Partido Nashonal di Pueblo (PNP) ku lider Ruthmilda Larmonie-Cecilia, Partido Un Kòrsou Nobo ku lider di partido Peter Alberto, Partido Union i Progreso ku lider di partido Elvis de Andrade, Un Kambio pa Kòrsou ku lider Raichel Sintjacoba, Partido Asertá, Visibel i Sigur (MAVIS) ku lider di partido Mavis Albertina, Partido Bienestar Kòrsou ku lider di partido Julius Koko, Trabou pa Kòrsou ku lider di partido Rennox Calmes, Partido Awor ta Basta ku lider di partido Marulla Chirino, Movementu Futuro Kòrsou (MKP) ku lider René Rosalia. René Rosalia mes no tabata presente ayera na entrega di lista.
E siguiente partido riba lista tabata Movementu Futuro Kòrsou ku lider Gilmar ‘Pik’ Pisas, Partido Democraat (DP) ku lider di partido Elsa Rozendal, Movementu Alsa Nashon (MAN) ku lider di partido Steven Martina, Kòrsou Vishonario (VISHON) ku lider di partido Miles Mercera. Despues Robert de Jesus a hasi entrega di e lista di kandidatonan pa su partido ‘Koperativa i Patriotiko’. De Jesus no tabata riba lista, pero manera hefe di Konseho Supremo Elektoral di Kòrsou Raymond ‘Pacheco’ Römer a splika. Ayera tabata liber pa tur hende ku ke lanta un partido i entregá lista di kandidato pa hasi esei. Ultimo partido ku a entrega lista di kandidato tabata Partido Inovashon Nashonal (PIN) ku lider di partido Susy Camelia-Römer.