WILLEMSATD.- Korte ta yega ma 240 ora di trabou komo kastigu pa e hóben shofùr Burny E. kende a keda hañá kulpabel di a kousa morto den tráfiko. E víktima tabata kore su bròmer e anochi di 24 pa 25 aprel 2015, ora e akusado su brek di outo a faya i a bai dal e motersaikel.
Wes a konsiderá ku e akusado ta kulpabel pa su akto. Pasobra e akusado a sali kas ku outo ku brek dañá. Sabiendo e konsekuensia tòg a subi kaminda. Pa loke ta trata e kastigu, wes a tene kuenta ku e akusado su edat yòn ora e echo a tuma lugá, i tambe ku Burny tin duele di loke a pasa. Tambe wes a tene kuenta ku e akusado ke kaba su skol.
Wes a chèk tur otro kasonan similar i a yega na e kastigu di 6 luna kompletamente kondishonal, pero e tin di traha 240 ora. Tambe tin di paga daño na e famia di Naf. 21.774.-, i prohibishon di kore outo pa 2 aña.
Dia a trata e kaso, e hóben shofùr a splika kiko a pasa e dia en kuestion. Despues di fiesta di su amigu na Janthiel, e amigunan a sali den dos outo rumbo pa buska un kos di kome. E hóben shofùr tabata ke a bai un trùk di pan riba Sta. Rosaweg ku yama “Chip Sigui”. Despues di einan e otro grupo tabata ke a bai “Hot Pepper”. Nan tabata rumbo pa Hot Pepper. Nan ta riba Sta. Rosaweg aserkando e lusnan di tráfiko pa subi Schottegatweg, na altura di Promenade.
Akinan e lus a bira oraño, loke ku ta pone ku e outonan riba Sta. Rosaweg mester para pa duna e tráfiko riba Schottegatweg preferensia. E otro outo ta para, pero esun di e hóben shofùr no tabata por a para, su brek no tabata bon i tur esfuerso ku e shofùr a hasi, e outo a sigui kore i krusa kaya. Akinan a surgi un choke teribel entre e outo i dos motersaikel.
E víktima Schotborg a sufri leshonnan asina grave na su kabes ku e konsekuensia ku el a keda un par di dia den koma pa despues e fayesé.
Fiskal den su demanda a tuma e hóben shofùr hopi na malu, pa motibu ku e tabata sa ku e outo ta tin problema ku brek i tòg el a kore e outo, ku tabata outo di su mama. Fiskal a pidi 12 luna prizòn di kua 6 luna kondishonal i 2 aña di prueba. Komo kastigu adishonal fiskal a pidi pa kita reibeweis pa dos aña for di e hóben shofùr. Sinembargo wes ta yega na otro kastigu.

Korte ta honra daño i perhuisio pa viuda

WILLEMSTAD. - Hues a honra e petishon hasí na Korte di daño i perhuisio pidí di parti di e señora viuda di e víktima Schotborg ku tabata un persona mashá stimá. E kaso a keda tratá dia 30 di novèmber tras di lomba i e dia ei por a sinti e doló  i tristesa den sala di Korte.

Despues ku hues a trata tur e puntonan investigativo di e kaso, a yega e punto kaminda ku señora viuda Schotborg por a apelá riba daño i perhuisio.

Riba dia di tratamentu, por bisa ku tabata un situashon hopi doloroso, pa tende kon den un frakshon di tempu tur kos di e famia a kambia, ku morto di nan ser kerí, tata etcetera. Un famia ku tabata biba den tur trankilidat, kos ta kana bon i direpente e persona ku ta trese plaka den kas a fayesé a konsekuensia di un aksidente di tráfiko, kaminda otro ta kometé fayo ireparabel.

Bida di e kasá ta kai den otro i bira un situashon kompliká i  difísil. Un bida di lucha konstante pa tene kabes riba awa.

Esaki a pone ku Stichting Slachtofferhulp a traha un rapòrt, bon motivá dunando un bon splikashon kiko ta e loke ku ta sali e kasá kòrtiku awor aki. Nan ta yega na un suma aktual di 21.774 florin. Esaki ta un suma ku a keda pidí i ku fiskal defakto a pidi hues pa honra e petishon.

Hues den su veredikto a indiká ku e plaka ku e viuda a pidi ta basá riba plakanan ku no ta drenta mas pa e señora por biba for di promé di mei 2015 te ku desèmber 2016.

Tabata evidente ku e víktima Schotborg, ta e persona ku ta trese sèn den kas. E tabatin un bon trabou i tabata gana sufisiente entrada pa hiba un bida trankil, i sin problema.

Ku morto di e kasá e viuda ta sinti falta di 1800 florin pa luna ku ta plaka ku e kasá tabata dun’é.

Esaki a pone ku hues a honra e demanda i a imponé ku e akusado Burney mester paga e señora e suma aki.