Mas liña krusero lo pone Kòrsou riba nan itenerario pa yüni i yüli benidero

WILLEMSTAD. - Despues di un periodo di un aña, porfin e linia krusero Celebrity Cruises por anunsiá ku nan lo kuminsá nabegá den área di Karibe i ta ofresé dos itenerario di kua un di nan ta pasa Aruba, Kòrsou i Barbados. Esaki ta bon notisia pa Kòrsou.

Celebrity Millennium ta dilanti den e linia di Celebrity Cruises ku a pasa den un programa di remodelashon ku a kosta 500 mion dòler i lo tin St. Maarten komo nan porta.

For di 25 di mart por kuminsá reserva i kumpra kruseronan di 5 i 7 anochi ku Celebrity Milleniun pa un di e dos itenerario nan ku e línea krusero ta ofresé. E kruseronan ta kuminsá nabegá dia 5 di  yüni benidero. Ta trata di Aruba, Kòrsou i Barbados i e oro itenerario ta Tortola, St. Lucia i Barbados.

Manera anunsiá e barku ta kompletamente renobá i a tene kuenta ku tur aspekto pa garantia safety di salubridat.

E barku lo nabegá ku turistanan adulto ku a bakuná i muchanan bou di 18 aña ku un resultado negativo pa COVID, despues di un tèst no mas di 72 ora bieu por subi e barku.

Preisnan pa e kruseronan ta kuminsá na 1.999 dòler i ta inkluí tur impuestonan.

Di e forma aki Celebrity Cruises ta marka un paso importante despues di un aña ketu pará. Despues di hopi ahuste, Celebrity ta kla pa ofresé vakashonnan safe i eksitante. E barku ta sali for di St. Maarten.

Den un komentario kòrtiku formulá pa redakshon di EXTRA, bosero di Curaçao Ports Authority (CPA) sra. Sau Bridgewater a duna di konosé ku tin mas liña krusero ku a anunsiá ku lo pone Kòrsou riba nan itenerario den lunanan di yüni i yüli benidero.