WILLEMSTAD.- Den kuadro di ahuste dje medidanan ku tin meimei di e pandemia di COVID, gobièrnu a disidí ku enbes di 10 lo permití presensia di 25 persona na momentu di entiero di nan ser kerí. Esei di akuerdo ku Promé Minister di Kòrsou sr. Eugene Rhuggenaath durante un konferensia di prensa ayera mèrdia. Segun e mandatario, último tempu tin hopi morto ta kai, e por komprondé ku e situashon aki ta unu hopi duru pa famianan si tin di permití 10 persona pa entiero.

Gobièrnu tin komprenshon pa esaki, pero sin pèrdè for di bista ku e punto di salida ta ku nos ta den un lockdown. Lo tene kuenta ku e aktividat importante aki pa kualke famia. Pero entrante awe solamente 25 persona lo por tuma despedida di nan sernan kerí, di kual ta 10 por drenta huntu parti paden pa despedí.

Es mas, tur bishitante ku ta akudí mester ta personanan ku a risibí un konfirmashon via di un òf otro medio, pues via di app òf mail òf kualke otro forma pa asina tin prueba pa esnan ku ta hasi e parti di kontròl.

E mandatario a splika ku ta e famianan ta esnan ku ta disidí ken nan ta permití pa ta presente durante entiero, pues esei ta algu ku ta famianan lo tin den man.