25 mion sumpiña pa konstrukshon di “Katedral di sumpiña”

Herman van Bergen

Cathedral of thorns/katedral di sumpiña

 

Otro siman lo ta apertura ofisial di e katedral di sumpiña den kura di Lanthùis Bloemhof. Mas di 2,5 mion di sumpiña a keda usa pa a konstruí e katedral mahestuoso aki i ainda no ta kla. Aki nos ta papia di 5 aña i mei di trabou.

 

Herman a studia arte na akademia na Arnhem. E tabata pinta den prinsipio i a traha hopi akuarela pa kalènder di Kòrsou durante di 30 aña. Kòrsou ta asina bunita ku el a traha hopi pintura. Pero tambe e a traha eskultura i Herman ta interesá den e komunidat i a traha. Tambe el a studia antropologia na universidat di Nijmegen. Na 2016 Herman van Bergen a gana e premio Cola Debrot na Kòrsou.

 

Siña di algu ku ta kousa doló…

Di un forma chistoso Herman el a bisa di a yega riba e idea despues di a haña hopi flèt tayer…. pero enrealidat Herman ta artista visual. El a bisa su mente ta hopi okupá sosialmente. E ke ekspresá e manera ku hende ta trata mundu. “Nos tin hopi problema di no bon edukashon, no a yuda hende pober, tin masha poko hende ku hopi sèn. Ta sushando oséano i nos ta sushando tera enbes di stima esaki. Nos ke laga e hende mira ku e sumpiña ta bunita. Tur hende ta odia e sumpiña pasobra e ta kousa doló, kousa flèt tayer pero nos a kambia e kos. Nos a kambia odio den amor”, Herman a konta Djasabra.


Idea di 16 aña pasa a bira realidat….

Herman a yega di traha un kabes di Hesus di sumpiña i e korona tabata di plèstik. El a hasié pa enfatisá ku ta sushando tera ku plèstik. E kabes di Hesus ta hopi bunita pa mira kon el a keda traha. E kos malu a pone riba kabes di Hesus i e tin doló pero Herman ta pensa ku ta nos ta e doló di kabes i nos ta pensa tiki ku paraiso nos ta biba ariba. Mester trata tera bon, tuma tur kuminda for di tera, ounke awor por mira ku tin hopi hende a bai den e direkshon ei. Ya ta 16 aña pasa ku el a traha un makèt di e katedral. I e maneho di Bloemhof a bisé ku si e logra e finansa e lo por trahe einan. I den prinsipio niun hende por a keda ora el a kuminsá ku e konstrukshon di e katedral di sumpiña.

 

Nada fásil….

Konstrukshon di e katedral no tabata fásil. Pero tur hende sa unda ta haña sumpiña i kon ta tene pasobra si tene robes “Bo ta yora”. El a usa 25 mion sumpiña pa e katedral i tin un edifisio di 1 mion na mangasina. Sumpiña ta resultado di e mundu nobo. Nan komo oropeo ta deskubrí e mundu nobo i a tòrnu e wayaká. A yama e islanan aki, islanan inutiles. “Pero ta kiko tin den nos mente pa a pensa asina. Nos a tòrnu e wayaká i wabi pero e wabi por krese bek i awe tin hopi obra ku por traha di dje”.

 

Un chèns pa hóbennan ku problema….

El a buska hopi sumpiña na Bullenbaai i awor tin un ekipo di 3 hende i nan ta buska e sumpiña ta Caracasbaai i Barbarabeach. Kòrsou tin hopi palu di sumpiña i ku un tiki áwaseru e ta krese bai.

E katedral ta 20X 20 meter kuadra i 10 meter haltu. E konstrukshon a kuminsá ku yudansa di Reda sosial ku a duna hóbennan ku problema un di dos chèns. Nan ke pa e hubentut sa ku por traha algu bunita ku kos malu. I tur kos ta malu pa e hende pober i mester usa pa usa kreatividat.

Ku esaki Herman a splika ku a usa un sumpiña ku ta kousa doló si e hinkabu pa siña e muchanan ku ta den problema. A traha sombré, korona i hopi mas, tambe lus i kantidat di obra mas di e sumpiña.

 

Tin espasio pa arte…

Siendo un artista el a bisa ku tin espasio pa estudio di arte na Kòrsou. El a pone énfasis riba Instituto Buena Bista kaminda por forma e mucha pa e por sigui mas avansá kisas na Ulanda. Tin teatro, músika, tin deporte, eskritor, poeta i hopi mas. Arte no ta pinta solamente pero tin diferente disiplina i esei nan lo pone énfasis riba dje durante di e apertura dia 2 di febrüari, ku ta pa invitadonan i for di 4 di febrüari e ta habri pa tur hende por bishita e katedral. Lo tin músika i lus pa iluminá e katedral.

Herman ta kontentu ku awor tin diferente lugá na Kòrsou kaminda ta pone atenshon na artistanan lokal manera Kaya Kaya, Fleur de Marie, Pietermaai. Awor tin mas balor na e ekspreshon ku ta muchu mas ku algu ekonómiko pero ta algu di e sentimentu. “Bo ta laga bo kurason bati pa felisidat i no miedu i ku no tin sèn”.

 

 

El a splika mas aleu ku for di 9/11 el a kuminsá traha ku sumpiña. E fecha ei tabata un doló pa humanidat ku e atakenan na Merka. Eksploshon di edifisionan i avionnan ku a kai.

Herman tin un eskultura grandi na Ulanda di 3 meter haltu i 5 meter hanchu i e obra ei ta biaha di siudat pa siudat. Ta un eskultura ku a usa diferente material pa papia ku e pueblo, for di fiesta te e forma kon ku polítikonan na Ulanda ta trata ku Kòrsou.

 

Eksposishon di artistanan…

Ainda tin di traha muraya patras i sera e katedral mas. Naturalesa ta importante pa nan pasobra si áwaseru ta kai kasi no por traha pasobra e leim no ta sera. E simannan ku áwaseru a kai aki a stroba nan un poko pa kaba ku e katedral.

Den e katedral tin e turtuga ku ta símbolo di tanjinos ku ta bin di a Arowaken. E kaska di  e turtuga ta protehá esaki su kurason. I na e entrada di e katedral esaki ta protehá e artistanan di Kòrsou ku ta mustra nan kreatividat den e obra aki. Den e katedral, por yama nan manera bentana ta eksponé obra di diferente artista. E katedral ta laga mustra e problemátika di historia pa un futuro bunita i briante. Kanando den e katedral di sumpiña aki nos por a tuma nota di símbolonan di religionnan mundial di awe i religionnan basa riba e naturalesa antiguo. Nos a tuma nota di obra di diferente artista invitá ku ta keda eksponé den e loke por konsiderá komo bentana nan den e katedral. E katedral di sumpiña ta na honor di mama naturalesa/mama tera i e spiritu liber ku ta logra e kambio atraves di kreatividat.

SHARE

LEAVE A REPLY