12 kaso nobo di kua 5 su fuente ta deskonosí

WILLEMSTAD.-Kòrsou tin un kantidat di 267 kaso aktivo di Covid awe djadumingu 11 di òktober. E informe ofisial ta trese e resultado for di 78 tèst ku a hasi. For di esaki tin 12 kaso nobo di personanan infektá ku Covid i 7 hende ku a rekuperá. Esaki ta hiba e kantidat di hendenan ku a tèst positivo for di mart te awor na 583. Tin dos hende hospitalisá.

E informe ta splika mas aleu ku di e 12 kasonan positivo nobo tin 7 kaso ku ta liga na kasonan eksistente, miéntras ku e sobrá 5 kasonan nan no por identifiká e fuente ainda. E trabounan ta tumando lugá pa asina pa medio di ‘contact tracing’ por saka afó kon i unda e hendenan ei a keda infektá.

Den siman tras di lomba dr. Gerstenbluth a splika ku na den ambientenan ‘inosente’ entre famia na kas i tambe ku koleganan di trabou tin hopi kaso di kontagio. Meskos tambe na entieronan kaminda hendenan den e momentunan emoshonal ta lubidá medidanan di higiena i tambe distansia sosial.