Entre 4 novèmber 2020 i 15 yanüari 2021

DEN HAAG.-  Ayera numa e dos miembronan di Tweede Kamer di D66 Paternotte i Diertens a haña kontesta ku nan a hasi den luna di desèmber riba e kódigo oraño ku Hulanda a pone pa Kòrsou relashoná ku e kantidat di kasonan di Corona vírus ku tabatin riba nos isla. E dos miembronan di D66 a pidi e minister di salubridat, desaroyo i deporte sr. Huge de Jonge pa haña e informashon promé ku dianan di Pasku, esta 25 desèmber 2020.

Pero tabata algu imposibel p’e minister kontesta e 12 preguntanan hasi tokante di e kódigo oraño i kiko mester a hasi pa biaha pa Kòrsou.

E miembronan tabata ke sa kuantu hende a biaha pa Kòrsou, despues di un rueda di prensa ku premier Rutte a duna dia 4 novèmber 2020, kaminda e ta bisa ku e no ta duna konseho negativo pa biaha den Reino.

E minister a splika ku entre 4 novèmber 2020 pa 15 yanüari 2021, tabatin 27.060 hende ku a biaha for di Schiphol pa Kòrsou. Tambe tabatin 25.644 hende ku a sali for di Kòrsou pa Hulanda. Pero mester tene kuenta ku e  sifranan aki lo no por ta kompletamente korekto, pasobra tabatin buelo, kaminda e avion ta hasi un aterisahe na Kòrsou i  sigui pa St. Maarten.

Te ainda promé ku sali for di Hulanda pa Kòrsou ta konta un PCR tèst ku no mester ta mas “bieu” ku 72 ora.

Entre 29 desèmber 2020 i 8 di yanüari 2021 mester a bula ku un PCR tèst negativo di regreso pa Hulanda. Esaki tabata obligatorio pa tur pasahero ku sali for di Kòrsou. Sinembargo for di 8 di yanüari, Kòrsou no ta keda konsiderá komo pais di rísiko pa e vírus di Corona, pues no mester di e PCR tèst negativo no e resultado “lihé” pa biaha pa Hulanda. Pues ora e hende regresá Hulanda e no mester bai karentena na su kas.

Dia 16 di desèmber 2020, Hulanda a duna mundu kompleto kódigo oraño pa biaha, debí ku gobièrnu a imponé un “lockdown” pa Hulanda.

Apesar ku no mester hasi niun sorto di tèst pa sali for di Kòrsou pa Hulanda pasombra e sifranan di Corona vírus a baha, e minister a bisa ku e kódigo oraño pa biaha mundialmente ta keda na vigor i hasta pa Kòrsou tambe.

Manera ta konosí, den dianan tras di lomba, gobièrnu Rutte a alargá e “lockdown” na Hulanda te den luna di mart. Pues ku un luna mas.