WILLEMSTAD.- Den wikènt tabatin 28 kaso nobo di covid-19 riba nos isla. Djasabra a mira un tendensia di 19 kaso nobo. Un oumento despues di bastante dia ku a mira un bahada bou di 10 kaso pa dia.

E 19 kasonan a surgi for di 780 tèst ku tabatin. Riba djasabra 10 hende a sali for di isolashon, miéntras tabatin 6 hende hospitalisá di kual 3 ta den kuido intensivo. E kantidat di kasonan aktivo djasabra tabata nèt 100.

Djadumingu e sifranan ta mas alentador, pasobra kasonan nobo ta 9 for di 1007 resultado di tèst. Bon ta ku 1 (un) persona a bandoná hospital. Esaki ta hasi ku tin 5 hende hospitalisá di kual 3 ta den kuido intensivo. 11 hende a sali for di isolashon. E kasonan ayera djadumingu tabata na 98.