WILLEMSTAD.- E siman ku a pasa tabata e promé siman piloto pa loke ta vakunashon di komunidat, i esaki tabata eksitoso. Esei di akuerdo ku sra. Iralice Jansen, epidemiólogo i miembro di e komishon di vakunashon. Segun sra. Jansen, e idea tabata ku den e promé siman lo a drai ku 2 mil vakuna, sinembargo den esun siman aki a vakuná no ménos ku 3.371 persona. Esaki ta un sifra te ku djaweps atardi. Esei ta nifiká ku muchu mas tantu persona a ser vakuná kaba den e proseso dje siman piloto. Pa ayera (djabièrnè) atardi ya kaba e sifra aki tabata riba 3.600.

Te awor por bisa ku di e kantidat aki un 2.500 persona ta riba 60 aña. A bisa for di un prinsipio ku lo kuminsá ku e trayekto di vakunashon ku e grupo di 60+ i tambe e grupo di trahadónan den kuido. Pa loke ta e último grupo aki ya kaba por bisa ku ya a pasa na CMC, Betesda i Advent Ziekenhuis.

Por bisa ku den e promé siman aki e kantidat di registrashon tabata hopi haltu. Por bisa ku un kantidat total di 7.500 persona a registrá kaba pa risibí e vakuna. Tambe tin di rekordá ku na momentu ku un persona registrá e lo haña dos sita mesora ya ku e vakuna ta konsistí di dos parti. Pues si e total di registrashon tabata 7.500, e kantidat di sita ta bira dòbel pues 15.000.

Segun sra. Jansen, pa loke ta e trayekto di vakunashon ta siguiendo ku e plan di ehekushon normalmente, i awor ta bai kuminsá ku eskalashon. Esei ta nifiká ku a kuminsá ku a siman piloto, pero awor lo bai over na vakunashon di mas tantu hende pa dia. E reakshonnan ku ta risibiendo di esnan ku ta bishitá e sentro di vakunashon na SEHOS ta positivo. Tin hopi hende envolví, mas ku 70 persona i trahando di dia i anochi i ku hopi amor pa e programa aki. Tin hendenan ku ta hasiendo sakrifisionan grandi pa por kumpli ku e programa aki. Tin un entusiasmo grandi ta reina bou di e personal ku ta ehekutando e programa aki.

Awor pa otro siman Kòrsou lo bai risibí e siguiente karga di vakuna. E registrashon ta kontinuá normalmente via dje number di tel. 9345 i tambe via ‘online’ www.vakuna.cw i por bisa ku via dje sistema ‘online’ lo por keda kla hopi lihé, i komo tal ta urgi tur hende ku tin akseso na wifi pa nan hasi uso dje sistema ‘online’ ya asina laga akseso liber pa esnan ku no tin akseso na internèt.