WILLEMSTAD.- Tim di atrako huntu ku tim di aresto a realisá detenshon di tres hòmber sospechá di atrako. Esaki kontinuando ku un investigashon relashoná ku un atrako kometé dia 3 di aprel 2021 den área di un resort na Banda Bou.

Ayera mainta, alrededor di sinku pa dies, polis a detené e hòmber sospechoso J.C. nasé Guandong di 27 aña di edat. Detenshon a tuma lugá na un establesimentu riba Winston Churchillweg.

Mas lat alrededor di 11 or, tim di aresto a hasi detenshon di un sospechoso mas na krusada Weg naar Westpunt/ Kaminda Prospero Popo Rojer. Ta trata di e hòmber sospechoso J.J.C.E. nasé na Kòrsou di 20 aña di edat. Durante di su detenshon polis a haña i konfiská un arma di kandela, un outo i mas artíkulonan. Tambe polis a tene entrada hudisial den un kas na Barber i a konfiská artíkulonan ku ta di importansia pa e investigashon.

Kontinuando ku e investigashon relashoná ku e mesun kaso aki, mas lat alrededor di kuartu pa kuater di atardi, polis a detené na Flip e hòmber sospechoso. Z.W. nasé na Guandong, di 29 aña di edat, relashoná ku e kaso ariba menshoná.

A presentá e sospechosonan dilanti un fiskal ouksiliar ku a ordená su enkarselamentu

pendiente di mas investigashon.