WILLEMSTAD.- E hòmbernan Melvrin Louiza (66), Ingemar Neuman(42) i Edward Morris(25) a keda apsolvé di kulpa den kaso Netflix.

Ta trata di e kaso den kual Warda Kosta a deskubrí un kantidat di 66819 gram di mariwana mas 3 arma di kandela i un makaku dia 16 di febrüari último. E armanan tabata den 3 hèmber ku tabata skondí den kueba i 2 otro lokalidat den área di Fuikbaai.

Segun Ministerio Públiko e 6 hòmbernan yu’i Kòrsou Melvrin Louiza (66), Violnelo Louiza (35), Jimmy Louiza (43) ( tata i yunan), Ingemar Neuman(42), Edward Moris (25) i Burney Eleonora (51), huntu ku e venezolanonan Franny Vasquez Hurtado (22), Gustavo Rodriguez Quero (55) i Alberto Vasquez Hurtado (21) ta responsabel pa e kargamentu.

Warda Kosta ku tabata vigilá e akusadonan fo’i oranan tempran di mardugá a tuma nota ku e botonan “Look me” i “Netflix” di e yunan di Kòrsou tabata bai bin. Promé ku nan a detené e  yunan di Kòrsou, nan a gara e lancha ku e 3 akusadonan venezolano ku a yega kosta, nèt ora ku e tabata bira bèk pa bai Venezuela. E 3 venezolanonan a bisa ku nan a bin pa traha na Kòrsou i no tin nada di aber ku e droganan ni arma.

Pa loke ta trata e akusado yu’i Kòrsou Jimmy, a bisa ku nan tur ta inosente den e kaso aki. Jimmy ta será huntu ku su tata Melvrin i su ruman hòmber Violnelo. Segun e akusado, nan ta hendenan di laman. Su tata semper a piska i awor ta un penshonado. E dia ei meskos ku vários otro bia, nan a bai kamper na Fuikbaai. Ora ku nan tabata ei nan, nan kier a bai mas leu pero dor ku laman tabata malu, nan a disidí di keda na Fuik baai. Nan a baha tur kos manera, kanaster, djùk di awa dushi, etc. pa kamper. E djasabra, nan a pasa henter dia na laman i mardugá nan a bai kana pa buska kref.

Segun Jimmy mas aleu, e mardugá ei, nan a tende zonido direpente di un helikòpter ku a para riba nan kabes, saka potrèt.

Mainta nan a disidí di bai kue nan hèmbernan den e boto “Look me” , ku nan a laga kantu awa ora ku nan tabata kue koncha i kiwa.  Jimmy a bisa ku e tabatin un kamisa blanku bisti i a kit’e pe wak e kanaster.

Despues nan a  bai bèk pa kuminsá “ruim op” pa nan bai karnaval. Yegando den “Spaanse Water”, Warda Kosta a para nan i hasi detenshon, pero no a haña nan ku nada di droga òf arma.

E akusado Melvrin a bisa ku nan ta sintando kastigu pòrnada. El a splika ku nan no ta hende ku ta hasi malu i no konosé e venezolanonan, ni no tin kontakto ku nan.

Segun e prosèsverbal di Warda Kosta, nan a wak dos hende ku hèmber subi e boto ora ku nan a bai e pida isla.

Fiskal a laga pasa un grabashon editá ku polis a traha, kaminda por a mira un boto chikí ku a para na un di e islanan ku tin den Spaanse Water, baha na kantu i kue algun kos lihé i hinka den e boto. Despues a resultá ku tabata Jimmy, Violnelo i Eleonora.  Ora nan a kaba e boto a bai bèk di kaminda el a bin.

Despues ku Warda Kosta a hasi detenshon, nan a bai bek na e sitio i a haña un hèmber ku e droganan aden i banda di e hèmber un suèter blanku paresido na e esun ku Jimmy tabatin bisti. P’esei fiskal ta konvensí ku e droga nan a wòrdu trese pa e trio venezolano i e hòmbernan yu’i Kòrsou tabata esnan ku a bai kue e hèmbernan di droga i arma skonde den e kuebanan kantu laman. Mirando tur esakinan fiskal a demandá tur 9 akusado na 6 aña di prizòn. Hues den su desishon no a haña ku por proba Neuman, Melvrin i Morris di tabata envolví den e kargamentu, pero si tur e otro akusadonan. Mirando esaki el a kondená nan na 4 aña kual 1 kondishonal mas periodo di prueba di 3 aña. Tambe hues bai di akuerdo pa konfiská e botonan “look  me” i “Netflix”.