WILLEMSTAD.- Djárason próksimo korte di promé instansia lo bai trata kaso di e atrako ku a tuma lugá riba un komersiante na altura di PSB bank dia 2 di yüni último.
Ministerio Públiko ta akusá 3 hòmber i dos muhé di ta involukrá den e atrako. Tur ta keda akusá di a kometé e atrako di 192 mil florin.
Riba e dia ei den oranan di mainta trempan, un komersiante ku kier a bai hiba e montante banko a keda brutalmente atraká.
Ta trata aki di un komersiante propietario di entre otro kantor di number.
Mainta trempan e komersiante a bai banko pa asina depositá e suma kuantioso di plaka, pero a keda sorprendé pa atrakadornan ku a presentá den un vehíkulo, atrak’é i pa despues maltrat’é i finalmente bandoná e sitio.
E komersiante a risibí tratamentu na e sitio i despues ambulans a transport’é pa departamento di emergensia di CMC pa tratamentu médiko avansá.
E kaso ta programá riba ròl pa keda tratá henter mainta djárason binidero. Tur e sospechosonan ta enkarselá i tin ku presentá pa responsabilisá nan mes pa nan akto.