WILLEMSTAD.-Un kantidat 203 persona a rekuperá di Covid asina e tim di epidemiologia ta informa awe djasabra 24 di aprel. For di 580 test realisá un kantidat di 30 hende a test positivo. Pa loke ta trata e sifranan di hospital te mèrdia tabatin 72 persona hospitalisá di kua 29 ta den kuido intensivo. Ainda tin 5 persona interná den kuido intensivo na Aruba. Tin un morto mas a bini aserka ku ta hasi e total di mortonan 103.

Mientrastantu e trabounan di bakunashon ta sigui. Awe na e base di marina na Parera bastante hende a bai tuma nan di dos dosis di Pfizer. Esnan ku EXTRA a kombersá kuné ta mira esaki komo e manera pa dentro di un tempu Kòrsou tambe por habri i normalisá mas tantu. Entre e komentarionan ku por a haña por indiká e preokupashon pa avansenan teknológiko ku den vários sektor tòg no a mira masha desaroyo. Hopi a spera ku meskos ku na vários parti di mundu Covid a aselerá digitalisashon, prosesonan ku ta kana mas lihé i un servisio realmente adekuá. Di otro banda e speransa ta haltu pa mira kambio den direkshon positivo.

Te djabièrnè 23 di aprel un kantidat di 65.247 hende a bakuna. E kantidat total di esnan ku a registrá pa bakuna a yega 73.833 i e kantidat ku a risibi nan di dos bakuna te djabièrnè ta 15.723.