WILLEMSTAD.- E akusado H. Chirino Perez (46) a keda kondená na 30 luna di prizòn durante su ousensia, despues ku fiskal a pidi 40 luna p’e.
Hues no a bai di akuerdo ku e demanda pa motibu ku hopi kos a bai robes den e kaso di Chirino Perez.
Chirino Perez ta keda akusá pa trafikashon humano di forma ilegal.
Remarkabel ta ku e akusado a bandoná nos isla den un vuelo di repartiashon ku gobièrnu a organisá pa indokumentadonan algun luna pasá.
Durante un kaso pro forma ku a tuma lugá anteriormente, hues a bai di akuerdo ku su abogado mr Ayubi pa suspendé su detenshon, pero ku e kondishon ku e akusado no por bandoná nos isla. Mirando ku e akusado ta ilegal riba nos isla e mester a wòrdu será den e departamento di barak pa indokumentadonan.
E kaso di e akusado a bai robes for di komienso. Hues komisario a lubidá na vários okashon riba dje.
Tambe a laga deportá tur esnan ku por tabata testigunan klave den e kaso aki.
Mirando ku e kaso a keda posponé mas di 3 bia den korte di promé instansia pa entre otro buska testigunan i tambe e akusado tin mas ku un aña será, hues a bai di akuerdo pa posponé su detenshon estriktamente bou di e kondishonnan menshoná.
Fiskal a bisa ku el a duna órden pa no laga e akusado bai manera hues a ordená, pero segun un fuente verídiko di Extra, fiskal no a duna esaki na esnan konserní pa no deportá e akusado.
Esei a pone ku ora e momento di repartiashon a yega, e akusado a subi avion boka será i regresá su pais Venezuela burlando di hustisia.
Segun e akusashon dia 13 di desèmber 2019, e akusado a trata na trese 30 adulto i un menor di un forma ilegal riba nos isla den un boto .
E ta keda akusá di tabata kapitan di e boto. E akusado a ninga di tabata e kapitan. El a bisa durante pro forma, ku e tambe tabata tripulante den e boto.
Segun e akusado, el a paga 300 dòler pa bin riba e boto. Su intenshon tabata pa bin traha na Kòrsou debí e situashon na Venezuela.
El a splika, na momento ku e kapitan a mira e boto di Warda Kosta tabata aserkando, el a kita bai para otro kaminda i gaña riba dje ku e tabata e kapitan.
Segun e akusado esei no ta kuadra ku bèrdat.
E kaso a keda tratá resientemente den su ousensia. Fiskal a haña e akusashon kompletamente probá i a demandá akusado na 40 luna inkondishonal.
Su abogado mr Ayubi durante su defensa a pidi hues pa sentensia su kliente e lokenan el a sinta kaba ku ta kasi 1 aña.
Hues den su desishon a bisa ku tin hopi kos ku a bai robes den e kaso aki fo’i komienso i ku e akusado no por keda perhudiká.
Mirando tur esakinan hues ta desviá for di e demanda di fiskal i ta kondená e akusado na 30 luna di prizòn.

(Foto File)