WILLEMSTAD.- Durante tratamentu di e kaso kaminda e homber Jerrely V. ( 45) i e muhé S.E. (40) ta keda akusá pa ladronisia, inkubrimentu, benta i poseshon di outo hòrtá,  e akusadonan a bisa ku nan ta inosente i no tin nada di aber ku e akusashonnan.

Jerrely ta keda akusá pa 4 ladronisia di vehíkulo. Entre nan ladronisia di un Kia Rio ku a tuma lugá dia 18 yüni  2023.

E doño di e outo ku a bira viktima, a bisa ku el a pone su Kia Picanto e dia ei na Caracaasbaai marina den oranan di anochi i ora el a bin bek, su outo a disparsé.

Polis ku a kore pasa den kaya na Koraal Specht kaminda e pareha akusado  ta biba, a mira un Kia Picanto paresido na esun ku a keda hòrtá, dilanti nan kas i tabatin skibi riba dje ku e outo ta na benta. Ora ku a baha kontrolá e outo, polis a mira ku e number di chasis ta kuadra ku e outo prosedente di ladronisia.

Durante di un kòmbersashon ku a keda di tap riba e dia ku e outo a keda hòrtá, polis a skucha kaminda Jerrely ta bisa un hende ku e tin un Kia Picanto kompletu na benta. Banda di esaki, e hende ta puntr’e ku el a haña e kosnan ku el a pidié, di kual Jerrely ta bis’e ku e mester tin pasenshi i ku e ta buskando e kosnan pe. E hende ta bis’e ku e tin ku bai wak banda di Mambo i den bisindario, di kual Jerrely ta kontestá ku e no ta bai ei banda fo’i dia ku el a hòrta un outo einan.

El a sigui bisa e hende ku nan tin e riba kámara i ku si ta sera e ke mir’e.  Den  su telefòn tambe polis a haña potrèt di e Kia Picanto ku a keda hòrtá i tabatin pone ku esaki ta na benta.

E akusado a duna di konosé ku e di ei e tabata pafó nèt ora algun gai chikí a kore pasa ku e outo i e outo a paga ku nan. Debí ku nan sa ku e ta mekániko, nan a pidié pa wak e outo pa nan. Despues el a logra drecha e outo  i no a mira e gainan mas. Despues di un par di dia el a mira algun gai kara tapa ta para wak den e outo i ora el a yama polis nan a kore bai. Fiskal a bisa ku na polis niun momento so e no a deklará ku nan a yama polis i despues ku a bai registrá, polis no a haña niun yamada di e suseso ei.

Pa loke ta trata e ladronisia di dia 27 di mei 2023, wes a bisa ku riba e dia ei, un hòmber a hasi denunsia ku nan a hòrta su outo para na Club Sugar. Segun e denunsiante, riba e dia ei, el a bai e diskotèk den Saliña ku su outo di trabou i a stashon’é, lòk e i ora el a bin bek, e no a haña e outo. Den e outo tabatin su telefòn di trabou i tambe un perfume di marka Valentino.

Polis a bai wak e seri di number ku tur telefòn ta bin kuné, di kual esaki tabata mustra di ta den funshon. Esei a pone ku polis a lokalisá e sitio ku e telefòn tabata i a logra yega na e bibienda ku a resultá di tabata di e pareha sospechoso.

Durante un entrada hudisial, polis a logra haña e perfume di mesun marka i tambe e telefòn. E akusado a bisa ku ta serka un mucha hòmber den Punda el a kumpra e telefòn pa 250 florin sin sa ku ta telefòn hòrtá.

Pa loke ta trata e último akusashon ku ta 2 di yüli 2023, doño di un otro Kia Rio ku a keda hòrtá na Grand Cafe, a bisa ku e dia ei el a para su vehíkulo na altura di  un establesimentu den Pietermaai.

Ora el a bai bek, e no a haña e outo. Polis despues di a hasi un investigashon, a logra lokalisá e vehíkulo na altura di Williwood.  Durante un kòmbersashon ku polis a skucha di tap entre e pareha, polis a tende kon Jerrely ta bisa e muhé ; Dushi bo sa kaminda ma kue e jeep, awèl einan bo tin ku para warda mi’. E akusado sinembargo a bisa ku e tabata kier men ku un jeep ku el a yega di kue di un hòmber makamba ku a pidié pa buska e jeep pa drecha. El a bisa ku nan tin un otro kas den Libu, ku e dia ei nan a bai einan paso no tabatin koriente na e kas i mesora polis a kulpa nan di tabatin vínkulo ku e ladronisia.

Pero ku esaki no ta e kaso. E akusado muhé S.E. a bisa ku fo’i despues di e kaso aki, e ta na man di si sikólogo. E ta malu tur dia i tin ku kumpli ku tur gastunan di kas. El a bisa ku e ta inosente i no tin nada di aber ku e kasonan.

Fiskal a haña e akusashonnan probá pa ámbos akusado.  Fiskal ta yega na un demanda di 48 luna di kual 8 kondishonal pa Jerrely i 200 ora di trabou boluntario pa komunidat pa e muhé S.E.

Despues di a bai deliberá wes a bisa ku di 4 akusashon kontra Jerrely korte ta haña ku por proba dos. Esaki ta pone ku wes ta desviá for di e demanda i ta kondena Jerrely na 36 luna di kual 30 kondishonal. Pa loke ta trata e muhé S.E. wes a bisa ku no por proba e akusashonnan kontra dje i ta apsolvé di tur kulpa.