WILLEMSTAD. - Dos hòmber yu di Kòrsou, por sierto alkohóliko a topa otro den sentro di siudat di Leeuwarden i pa un motibu òf otro nan a pega pleitu formal ku otro. Durante e forsageo ku a tuma lugá un di nan ta kai abou i e otro a saka un skrufdrai ku e tabatin den su saku i a propiná e paisano ku esaki na 7 okashon den su lomba.

E heridanan tabata serio i ku urgensia mester a transport’é pa hospital pa tratamentu médiko.

E víktima ta skapa loke ta pone ku e akusado a keda akusá pa intento di asesinato.

Segun e deklarashon di e akusado, e ta bisa ku e otro hòmber lo a atake ku un bòter kibrá i tur loke ku el a hasi ta defendé su mes, pues el a apelá riba defensa propio.

Konforme deklarashon di testigunan i kámaranan di seguridat ku tabatin den e área, ta ilustrá otro. E hòmber víktima lo a kai i ora el a bira riba su barika pa e lanta, e akusado a bula riba dje i hink’é 7 biaha den su lomba.

Manera menshoná e heridanan tabata serio. E suseso a tuma lugá 7 di yüni di e aña aki i te ku siman pasá na momentu di e veredikto, ainda e víktima tin problema ku halamentu di rosea, esei ta bai ku hopi doló, segun e rapòrt di dòkter.

Un di e perforashon den su lomba a bora e pulmon, loke ku a pone ku e pulmon a klap sera.

Fiskal ta di opinion ku 30 luna kastigu di prizòn, di kua 10 luna kondishonal ta na su lugá i a pidi korte pa honra 5.000 euro pa daño i perhuisio pa e víktima.

Korte den su motivashon ku ta konta ku 12 paginá, ta di opinion ku gran parti di e loke fiskal a trese dilanti, esta loke ku ta e kastigu di prizòn, korte ta di opinion ta na su lugá, pero pa loke ta trata e daño i perhuisio, Korte ta yega na un suma di 3.478 euro.

Pues algu ménos di loke ku fiskal a pidi kore pa honra. E akusado a keda defendé pa abogado mr. B.P.M. Canoy i e fiskal tabata mr. E.R. Jepkema.