WILLEMSTAD.- Djabièrnè último, polis konhuntamente ku K.Mar, Duana, Ministerio Públiko i Brantwer a tene kontròlnan di tráfiko i uso di alkohòl den tráfiko.

E kontròlnan aki a tuma lugá entre mitar di ocho di anochi pa dies or di anochi riba Kaminda Venacio F. Isenia i entre mitar di diesdos pa un or riba Sta. Rosaweg.

A kontrolá un total di 126 vehíkulo i a partí un total di 55 prosèsverbal pa e siguiente infrakshonnan:

Manehá un vehíkulo sin: reibeweis bálido, ku e impuesto di vehíkulo ta pagá, seguro  bálido,  karchi di kùr bálido, lus di dim, di brek.

Manehá un vehíkulo: ku glas skur.

Durante di e kontròlnan kran a transportá 7 vehíkulo.

Dos shofùr mester a pasa tèst di alkohòl serka personal di K.Mar i un estranhero ku no tabatin su dokumentunan na òrdu mester mèldu na Departamento di Imigrashon.

Ministerio Públiko a topa ku un total di 30 persona ku tabatin but atrasá, di kual 13 persona a drenta areglo di pago i a kobra un total di Nafl. 638,-.