WILLEMSTAD.- Ayera tardi a tuma lugá e lansamentu ofisial di e loke a bira “24-7 Taxi Curaçao”, ku ta papia pa su mes, kual ta un servisio di taksi ku durashon di henter dia, pues 24 ora i 7 dia pa siman. Ta trata aki di un servisio ku a bira posibel ku koperashon di e grupo di taksistanan di “Thirty Steps Association” i 24-7 di Securitas Antias.

Na e okashon aki sr. Hubert Hart, presidente di Thirty Steps Association (TSA), a trese dilanti ku TSA a mira lus di dia riba 12 di òktober 2007 i el a ser fundá ku 15 miembro. I ta dor di e 15 miembronan aki mes e organisashon a haña su nòmber. I e nifikashon ta basta simpel: 15 biaha dos pia ta 30 paso (30 Steps). TSA a ser lantá na ofisina di notario Huang.

Originalmente e organisashon aki a ser lantá ku e meta pa bira un fondo di spar, pero e idea ei no a kristalisá. Na 2008 a hasi algun kambio den e statutonan i a bai over na hasi uso di komunikashon di radio análogo ku e tempu ei nan a hür na Zenitel, i despues pa radio digital. Mas aleu tambe a palabrá ku asosiadonan ku lo bai tin un union den presentashon, na vestuario, servisio, vehíkulo i tarifa. Tabatin un palabrashon ku un agensia di outo pa a kumpra tur nan outonan koló hel, pero e dil ei tampoko a kana manera palabrá.

Na 2009 TSA a ser rekonosé komo partner di kòmbersashon di gobièrnu di Kòrsou dje tempu ei. Na 2010 TSA a konosé otro kambio i asina su miembresia a oumentá i alkansá mas o ménos 40 miembro. Pero ku e oumento den miembresia aki a kuminsá pensa tambe riba inovashon. I ku e idea di inovashon a aserká un kompania (Curacao Data Services) ku e tarea pa yuda e grupo pa lanta un sentral di data mas moderno i hasi merkadeo pa nan por a haña mas trabou. Lamentablemente na final di e investigashon ei a bin resultá ku finansieramente TSA no por a kumpli ku e proyekto ya ku el a resultá muchu kostoso.

TSA a konosé hopi desaroyo, i asina a trata di drenta un dil ku un kompania di Sürnam den un sistema di app digital, pero esaki tampoko a kristalisá pa motibu di falta di kapasidat di parti dje empresa Sürnameo. Pero na 2017 a bai over na uso di radionan di komunikashon via satélite, ku tabata un bon desishon.

Ku yegada di e pandemia di COVID-19 na 2020 turismo a kai den otro i komo tal taksistanan tambe a sinti e gòlpi, segun sr. Hart. Nan no a sinta ketu i a sigui sondia, i finalmente a bin haña apoyo di Securitas ku a kere den henter e proyekto. Finalmente el a bin resultá den un “smart taxi app” bou dje nòmber 24-7 Taxi.