WILLEMSTAD.- E Tim Multidisiplinario ta kontinuá ku su kontròlnan riba medidanan di COVID-19. Den un siman di tempu di 9 di mei pa 16 di mei, e Tim a kontrolá 83 establesimentu di kual 34 tur kos tabata na òrdu i ta 41%; un total di 23 establesimentu kual ta 28% a haña un aviso i 26 ku ta bon pa 31% a risibí un but.
Djasabra 15 di mei, e tim a kontrolá 11 Establesimentu di kual 6 tur kos tabata na òrdu i 5 a haña un but.
Un establesimentu riba Caracasbaaiweg a risibí un but pa no entrega kos na outo. Mesun tipo di but a kai pa un snèk den Saliña.
Bar/restorant na Dokterstuin a risibí but pa permití hende drenta paden pa kumpra i konsumí na e sitio.
Na un snèk den Gato a parti but pa tapaboka. Finalmente un establesimentu riba Sta. Rosaweg a haña un but pa orario di sera.
E resultadonan di e kontròl djadumingu 16 mei 2021 ta indiká ku a kontrolá 7 establesimentu kuminsando for di den área di Pietermaai bai te Bapor Kibra. Di e kantidat di 7, na kuater establesimentu tur kos tabata na òrdu, i tres a haña un but.
Un bar na Bapor Kibra a haña un but pa aglomerashon; restorant riba Koraal Spechtweg a haña but pa no kumpli ku entrega na outo; i trùk di pan riba Caracasbaaiweg a risibí un but pa no sera segun orario.