WILLEMSTAD.- Gobièrnu di Kòrsou djadumingu anochi a duna di konosé ku Kòrsou a konosé un kaso lokal èkstra. E kaso aki su fuente no ta konosí ainda. Komo konsekuensia ayera Kòrsou a konosé 68 kaso, 32 di e kasonan ta kasonan aktivo. Den total 35 hende a rekuperá. Manera ta konosí 1 persona a fayesé den luna di Mart, kual tabata un turista hulandes ku a bin Kòrsou kontagiá ku vírus di Covid-19 kaba. El a fayesé den nos hospital CMC.

Den un komunikado di prensa di Gobièrnu di Kòrsou djadumingu mainta a duna di konosé ku nos pais tin sinku kaso lokal èkstra. Esaki despues di a hasi mas òf ménos 140 tèst djasabra último. Tres di e kasonan ta ligá ku e kasonan eksistente. Dos  di e kasonan su fuente no ta konosí ainda.

Dr Izzy Gerstenbluth djasabra mainta a splika ku for di djabièrnè tabatin sinku kaso nobo. Tres di e kasonan nobo ta relatá ku un hende positivo ku tabatin kaba den isolashon. ‘Ku dos di e kasonan nobo nos no por a detektá un link ainda. Un di e kasonan ta un empleado di CMC’, asina dr. Izzy Gerstenbluth a bisa djasabra último.

Manera ta konosí Gerstenbluth ayera a sali for di Kòrsou. Durante konferensia di prensa djasabra mainta último  Gerstenbluth a bisa ku e ta bai pafó. ‘Pero trabou di Departamento di Epidemiólogo lo sigui normal. Si mi tei òf no, tur trabou lo lo sigui normal.’  Gerstenbluth a bisa ku tim di epidemiólogo ta hopi bon prepará pa hasi e trabou importante ku nan tin ku hasi. ‘No ta importante ku mi tei òf no. Nan lo kontinuá ku nan trabou’

Gerstenbluth lo bin bèk Kòrsou djaweps 4 di sèptèmber. Despues e tin ku bai den karentena. ‘Pero tur trabou lo sigui. Nada lo kambia.’ Gerstenbluth no por a bisa nada kiko e ta ferwaktu di e situashon na Kòrsou ora e bin bèk. ‘Mi no por bisa nada di esei.  Mi no tin mi bola di kristal huntu ku mi tampoko. Mi kier men ta hopi difísil pa pronostiká e situashon.’