PHILIPSBURG.- Covid-19 a pone lus fiho riba algun asuntu kritiko den hopi komunidat. E problemanan ku kalidat di internèt ta haña atenshon na Sint Maarten tambe te ku parlamentario Gumbs a aserká minister di Telekomunikashon, Turismo i Asuntunan Ekonómiko Ludmila de Weever e siman aki.

E parlamentario Melissa Gumbs di Party for Progress ta kuestioná tareanan di Bureau Telecommunicatie & Post di Sint Maarten komo e reguladó pa asuntunan di telekomunikashon i pòst. Na 2015 Kontrolaria General di e isla a traha un rapòrt riba e maneho di BTP i e status di ICT riba e isla.

Segun Gumbs, awendia debí na e pandemia tin mas uso di infrastruktura di telekomunikashon, prinsipalmente internèt. Skolnan pero tambe gobièrnu ta pidi siudadanonan pa atendé mas tantu asuntu posibel digital. Empresanan tambe ta hasi mas uso di internèt i e trahadónan ku mester traha for di kas. Tur esakinan ta pone ku tin mas preshon pa un mihó kalidat di servisio.

E miembro di parlamento a puntra minister de Weever kon a para ku e proyekto piloto ku BTP a kuminsá kuné na Sint Maarten. E proyekto aki ta enserá ku BTP ta instalá sierto aparato den vehíkulonan ku ta kore rònt e isla i di e forma ei ta midi  kalidat i speed di internèt rònt Sint Maarten.

Gumbs ke sa kiko e resultado di e investigashon ta i spesialmente si e kompanianan ta kumpli ku loke ta mará na dje. Na opinion di Melissa Gumbs, si e kompanianan di telekomunikashon na Sint Maarten no por kumpli ni sikiera ku e komunidat lokal ta kon por spera ku nan ta kumpli ku otro hendenan ku e isla ta invitá komo bishitante?