E sèn ta pa Korsou, Aruba i St.Maarten

WILLEMSTAD.- Gabinete Ulandes ta asigná € 15,2 mion mas pa e programa di yudansa den forma di kuminda na Aruba, Kòrsou y Sint Maarten. Desde e pandemia di COVID-19 y pa motibu ku turismo a kai afó, e abitantenan riba e tres islanan ta eksperensiando retonan grandi. E problemátika di pobresa a oumentá konsiderablemente riba e islanan.

Sekretario di estado Raymond Knops: “Punto di salida di gabinete tabata semper, ku Ulanda no ta laga e personanan mas vulnerabel na kaya. Durante mi último bishita di trabou, mi a eksperensia kon penoso e situashon ta na sierto parti den nos Reino. Ta di gran importansia pa kontinuá ku e programa di yudansa den forma di kuminda e periodo benidero tambe.”

Desde mei 2020, gabinete Ulandes a pone plaka disponibel pa yudansa den forma di kuminda na Aruba, Kòrsou y Sint Maarten. Na e momentonan aki ta yudando total, mas òf ménos 80.000 persona ku yudansa den forma di kuminda, ku Hulanda ta hasi posibel.

Cruz Cora ta koordiná e programa di yudansa den forma di kuminda. Pero ta trahando duru tambe pa bai over riba un forma mas struktural di e programa, bou di responsabilidat di e tres paisnan. Ku e medionan aki, yudansa den forma di kuminda ta garantisa te promé di yüli 2021.