KRALENDIJK.- Trahadónan di RCN na Boneiru ta bai traha 36 ora pa siman na lugá di 40 ora pa siman. Esaki ta basá riba un CAO ku a sera ku sindikatonan ABVO, Straf, ACOM i NAPB den representashon di e trahadónan. Pues no solamente a subi nan edat di penshun di 65 pa 66 aña entrante 2030 pero tambe nan ta konosé adelanto den nan kondishonnan di trabou.

Sindikalista Roland Ignacio a splika EXTRA ku e kambio di 40 ora di trabou pa siman pa 36 ora pa siman ta un kambio ku a tuma lugá na analogia di Ulanda. Esaki sigur ta un adelanto den sektor publiko pa islanan BES. E empleado publiko ta bai traha ménos ora pero e ta sigui kobra mesun salario. E 4 ora liber pa siman ta den kuadro di intenshon pa e empleado drecha su kalidat di bida siguiendo preparashon pa adelanto òf simplemente hasi algu na su desaroyo personal i di famia.

Kombiná na e desaroyo importante aki ta krea e kuadro ku 50 funshonnan nobo ta presentá durante di próksimo 3 añanan ku hendenan kuminsá traha 4 ora ménos pa siman. Ku otro palabra debí ku hendenan ta bai traha 4 ora ménos pa siman mester buska mas empleado nobo pasobra e nivel di servisio mester keda meskos òf mester mehora.