Ruisandro Cijntje a huramentá komo minister Desaroyo Ekonómiko

WILLEMSTAD.-Awe mainta e kandidato di partido Nashonal a huramentá dilanti su ekselensia gobernador komo e minister nobo pa Desaroyo Ekonómiko (MEO). Despues di baha trapi di palasio, el a bisa ku e ta kla pa bai enfrentá e reto. E ta prepará i e tin un tim i un Parlamento pa bai enfrentá e reto.

El a kana ku e minister saliente di ekonomia. Tres punto komo punto di lansa ta na promé lugá turismo, na di dos lugá pèrmitnan ku ta wantá pa los eseinan pa invershonista lokal por invertí i na di tres lugá buska invershonistanan djafó.

Ta bai wak tur loke ta kanando pa pèrkurá pa sigui kana. Pais no por warda 100 dia, e tin guia di su lider i minister presidènt ku ta guia e proseso pa asina tur kos por kana bon.

Minister presidènt Pisas a hasi e remarke ku su gabinete asta promé ku nan sinta mester a enfrentá situashonnan ke men nan no por papia di 100 dia. Premier Pisas a bisa ku no tin fondo nesesario pa kumpli ku hopi kos. E situashon no ta dje fásil ei.

Mas aleu el a bisa ku el a papia ku Ulanda i echo ta ku mester kumpli ku eksigensianan, pero no tin e hendenan pa por logra esei ni tampoko e plaka ku ta nesesario. A hasi petishon na Ulanda pa yudansa finansiero pa e di kuater kuartal di aña i ya kaba e gabinete Pisas a haña tende ku Kòrsou lo no haña tur loke a pidi pasobra no ta kumpliendo ku tur e eksigensianan.

Tin situashon difísil den pais, shofùrnan di bus ku ta pidi yudansa, hendenan ku ta pidi pakete di kuminda i asina por sigui menshoná. E problema di mas grandi ta 14 mion di défisit di e gobièrnu anterior. E bentana no por habri pasobra no tin sèn. Ta bula yüni, ta bai paga yüli, ougustus i sèptèmber. Situashon no ta fásil pero ta bai hasi su bèst.