WILLEMSTAD.- Den eksposishon di eskultura na Amsterdam, mihó konosí komo ARTZUID, tin obra di 4 artista di Kòrsou: David Bade, Carlos Blaaker, Nelson Carrilho i Tirzo Martha.

ARTZUID ta tuma lugá kada 2 aña i e biaha aki ku obra di 50 artista. Tur obra ta pafó, den aire liber i p’esei e eksposishon ta fásilmente aksesibel. Esaki ta e di 7 edishon i título di 2021 ta ‘Imagine’. Motibu pa esaki ta ku ta 50 aña pasá ku músiko i defensor di pas John Lennon (1940-1980), a skirbi e piesa ‘Imagine’. E komishon organisadó ta argumentá ku tur artista ku nan a invitá ta, meskos ku Lennon den su tempu, konserní ku tópikonan aktual i ta soña ku kon por drecha mundu su sombré skèins.

E ruta di eskultura ta 5 kilometer i ta inkorporá un eskultura di John Lennon banda di un ‘peace-sign’, kreá pa Laura Lian, na entrada di e hotel Hilton. Esaki ta e hotel kaminda Lennon i Yoko Ono a pasa nan biahe di luna di miel ku e famoso ‘Bed-in for peace’.

Promé eskultura di un artista yu di Kòrsou den e ruta ta di Tirzo Martha. Su obra ‘The Interpretation and Identification of the Meaning of Life’ ta un toren di diferente kouchi di heru konteniendo opheto manera un tayer di outo. Riba e tayer tin e teksto skirbí ‘Lapi bo tire aki’ (na Papiamentu). Ta opvio ku e artista ta provoká nos pa pensa mas profundo riba nifikashon di e ponensia den título di su obra.Tirzo ta usa material i opheto di uso diario pa su obranan. Asina e ta logra komuniká ku un públiko kuantioso i diverso.

Nelson Carrilho ta representá ku 2 obra den bròns. “The other face’ ta un figura ku ta kita su antifas, pa mustra nos su kara. Pero e kara berdadero ta sin fisionomia i sin ekspreshon. ‘Dragers van Verre’ (Kargadónan djaleu) ta un eskultura ku un altura di 4 meter. E obra ta simbolisá diáspora di diferente pueblonan ku pa kualke motibu ta sali for di nan país natal, pa forma un bida na un otro lugá. Alabes esaki ta historia propio di e artista.

E obra di Carlos Blaaker ‘Balancerend met mijn dingen’ (Balansa di tur mi kosnan) ta un obra ku ta rekonosibel, dor ku na Otrobanda tin dos eskultura di e artista ku ta igual: un busto di un figura femenino ku un karga riba su kabes. Serka e obra na ARTZUID Carlos Blaaker ta pone mas atenshon na e balansa dor ku solamente e punta di e karga enorme ta hasi kontakto ku e kabes. Komosifuera indikando ku e balansa ta algu difísil i prekario.

David Bade ta e delaster eskulturor kurasoleño den e ruta. Bade ta partisipá ku e obra ‘Appropriation Apropos’ (Apropiá Apropósito). Esaki ta un eskultura di un breakdancer riba un aparato di ehersisio físiko. E eskultura tin koló di bandera Ulandes: korá, blanku i blou. Breakdance ta un estilo di baile ku a originá den barionan marginal na Merka, na añanan setenta. E baile tin moveshon akrobátiko kompliká, lokual ta pone ku e no ta fásil pa hasi. Kisas Bade ta usa koló di bandera Ulandes pa indiká ku apesar di e popularidat di breakdance den mundu oksidental, e ta algu for di un otro kultura ku a ser apropiá.

ARTZUID ta e bienal di eskultura di Ulanda prestigioso, ku ta tuma lugá den e bario Amsterdam-Zuid. E eksposishon a kuminsá for di 1 yüli i ta keda te ku 17 òktober 2021. Por haña mas Informashon riba nan wepsait artzuid.nl.

Riba e Imágen:

- Laura Lian: ‘John Lennon Peace Statue’ (2018).

Tirzo Martha: ‘The Interpretation and Identification of the Meaning of Life’.

Nelson Carrilho: ‘The Other Face’ i ‘Dragers van Verre’.

Carlos Blaaker: ‘Balancerend met mijn dingen’.

David Bade: ‘Appropiation Apropos’.

Skirbí pa Josée Thissen-Rojer (historiadó di arte. Na 2011 el a lanta Curaçao Art, pa krea un plataforma pa arte visual di Kòrsou. E ta publiká regularmente tokante arte visual, ta konferensiante i konsulente. Mas informashon: www.curacao-art.com).