WILLEMSTAD.- 4 persona inkluyendo un menor di edat a keda detené djasabra último. Esaki kontinuando ku un investigashon den un kaso di ekstorshon kometé dia 28 i 29 di mei último riba un negoshante.

Alrededor di bintisinku pasá di nuebe di anochi tim di aresto konhuntamente ku e tim di atrako a detené e sospechoso maskulino K.L.L. di 17 aña di edat, nasé na Kòrsou, pa e kaso ariba menshoná. E detenshon di e sospechoso a tuma lugá na Incastraat.

Seguidamente alrededor di 21.35 or riba Schottegatweg, tambe e unidat a detené tres (3) sospechoso mas, pa mesun kaso. Ta trata di e hòmbernan:H.R.W. di 29 aña di edat, S.D.M.V. di 23 aña di edat i S.E.A.Th. di 26 aña di edat, tur nasé na Kòrsou. En konekshon ku e detenshonnan akí, e agentenan a tene dos (2) entrada hudisial na dos (2) diferente adrès, respektivamente na Kaya Plateau i na Druifweg. Durante di e entradanan hudisial a konfiská algun artíkulo ku ta di importansia pa e investigashon.

A presentá e kuarteto dilanti di un fiskal ouksiliar ku a ordená nan enkarselamentu, pendiente di mas investigashon.