WILLEMSTAD.-E informe ofisial di gobièrnu di Kòrsou pa loke ta trata Covid-19 ta indiká ku pa e fecha aki tin 19 kaso positivo nobo i tambe 21 kaso ku a rekuperá. For di mart te ku awor Kòrsou a konta un total di 837 kaso positivo di kua 555 a rekuperá. Tin un total di 281 kaso aktivo i 4 hende ta hospitalisá.

Pa loke ta trata e 19 kasonan positivo nobo e tim ta informá ku 15 ta liga na kasonan eksistente i tin 4 kaso di kua e fuente no ta konosí ainda. E proseso di ‘contact tracing’ ta sigui ku e empeño pa determiná e fuente di e 4 kasonan menshoná. Te ku ayera tabatin 5 persona interná den CMC pero unu a rekuperá i por menshoná ku di e 4 hendenan ku ta hospitalisá tin dos ku ta den kuido intensivo.