Medida di mas importante ta TENE distansia, evitá aglomerashon di hende

WILLEMSTAD.- E informe ofisial di e tim di salubridat ta indiká ku di 64 tèst ku a realisá 4 tèst a sali positivo, pues tin 4 kaso aktivo nobo di Covid na Kòrsou. Ta bon pa menshoná ku 6 hende ku tabata positivo a rekuperá, miéntras ku unu a keda hospitalisá. Kòrsou tin pues for di mart te ku awor 92 kaso ku a tèst positivo di 46 ta aktivo, 45 a rekuperá, asina dr.Izzy Gerstenbluth a duna di konosé.

Un bia mas el a enfatisá ku una bes ku tin transmishon lokal, mester tuma sierto medida pa evitá ku e transmishon lokal ta sigui plama te na un nivel ku no por kontrol’e mas. Sinembargo ta tene kuenta pa e medidanan ta den balansa. Esaki ta nifiká ku ta tene debido kuenta pa no tuma medida ku por hasi daño di manera ku e medida no tin efekto ku  ta pió pa e mesun komunidat ku ta trata na kuida. P’esei tin e sistema di eskalashon di e medidanan den fase. Manera konosí tin fase 1 kaminda tin kasonan importá, por detektá nan, isolá nan i asina evitá ku e ta sigui plama. Den e di dos fase ta bini aserka transmishon lokal, pero e fuente ta konosí di manera ku por detektá, isolá i hasi contact tracing. Den fase tres ta asina ku e kantidat di transmishon lokal a bira hopi, klusternan a oumentá òf a surgi un ‘outbreak’ di 10 kaso òf mas den un bia. Esei por kondusí na medidanan mas severo manera plachi di dia i ‘lockdown’ pa kontrolá e situashon. Nos no a yega fase 3 ainda, ainda nos ta den fase 2 asina Gerstenbluth a enfatisá.

Tin diskushon kon bin no ta laga sierto aktividatnan tuma lugá, miéntras skolnan si ta keda habrí. Gerstenbluth a splika ku den fase 3 por sera pa atrobe, ei mes el a pidi pa kòrda riba e balansa i kòrda riba e efektonan na momentu ku sera skolnan.

E medida di mas importante ta keda tene distansia i evitá aglomerashon di hende. E manera di mas fásil i efektivo pa transmití e vírus ta via gota. Anto esei ta sosodé ora  ku papia, nister i tosa. Den e kasonan ei e gotanan por infektá hende, sigur den espasionan será.

Ta evaluá kada tres siman pa disidí si mester hasi medidanan mas fuerte òf si por de-eskala. Mas detaye den edishon di EXTRA.