WILLEMSTAD.- Ministerio Públiko djamars último a pidi den e korte militar na Arnhem ‘vrijspraak’ (apsolushon) pa 4 militar ku tabata embolbí den un aksidente ku morto ku a tuma lugá na aña 2015 aki na Kòrsou na Caracasbaai, durante un ehersisio. Ministerio Públiko na Arnhem a akusá e 4 militarnan di no a tene nan mes na e reglanan konforme nan trabou, dor di no a stòp e duikmentu ora no tabatin kontakto mas ku otro, kual a okashoná un situashon di bida òf morto.
Hustisia a konkluí ku huridikamente e reglanan no tabata poné na un forma korekto, kual ta nifiká ku e 4 akusadonan por a wòrdu akusá di un akto penal.
E fiskalnan ta papia di un final no satisfaktorio i nan ta hasi menshon ku e forma ku e investigashon hurídiko a tuma lugá no tabata muchu agradabel dor ku el a tuma hopi tempu pa e akusashonnan.
Durante e kaso penal ku a dura par dia i despues di a skucha diferente testigunan i ekspertonan, a konkluí ku den ministerio di Defensa tin diferente interpretashon di e reglanan i tambe kiko e konsekuensia hurídiko por ta.
E konklushon ku no por tin konsekuensianan penal, no ke men segun Ministerio Públiko ku nan no a kometé erornan.
Paso ya kaba dor di e aksidente di duikmentu tabatin un rapòrt di investigashon hopi kritiko. E fiskalnan ta spera ku dor di e kaso aki lo duna un motibu pa por wak i investigá kiko ta e riesgonan ku tin den Ministerio di Defensa.
E insidente lamentabel a tuma lugá dia 23 di novèmber 2015, ora ku e militarnan a hasi un ehersisio na Caracasbaai.
E kolega a duik na un profundidat di mas o ménos 40 meter. Ora e dama víktima no tabata reakshoná mas, nan a kuminsá ku un akshon pa salb’é pero esei no a yuda mas.
Te ainda no ta kla ta kiko presis a pasa. E víktima no tabatin su sèt di duik mas bistí ora nan a sak’é fo’i awa. Segun e patólogo el a muri dor di asfiksashon (stek) pero e motibu di e stekmentu no por a wòrdu spliká.