WILLEMSTAD.- 4 di e total 8 ministernan di gabinete Pisas ta di biahe atrobe. Ta trata di ministernan Charles Cooper (VVRP, MFK), Javier Silvania (Finansa i GMN, MFK), Shalten Hato (Hustisia, MFK), i Ruisandro Cijntje (MEO, PNP).
Cooper ta partisipá di 1 te 9 di yüni na e di 26 konferensia anual di “Caribbean Postal Union” i e di 20 edishon di “Caribbean Councel of Ministers for Postal Affairs” ku ta tuma lugá na Grand Cayman. Ta di dos biahe djis tras di otro ku Cooper ta hasi mirando ku di 19 te ku 26 mei e tabata na Barbados pa e konferensia di UNCTAD (“United Nations Conference on Trade and Development”).
Cooper ta informá ku durante e konferensia postal na Cayman Island el a risibí invitashon pa partisipá na un diskushon den grupo (“panel”) riba futuro i e situashon aktual di servisionan postal na Kòrsou i islanan di Karibe. Tendensianan notabel manera e bahada den volúmen di ingreso postal a resaltá den e diskushonnan loke ta kousa nesesidat pa solushonnan inovativo pa adaptá na demandanan nobo.
Minister Silvania tambe ta di biahe atrobe pa otro konferensia di SIGMA. Si resientemente e tabata na Malta awor e minister a biaha di 30 di mei pa 8 yüni pa Filipina kaminda un biaha mas e indiká ku e mester atendé e konferensia den kuadro di e lei di onling gambling.
Di 10 pa 18 di mei último Silvania tabata na Malta pa asistí na e konferensia di iGaming Next. Tabata di 5 biaha ku Silvania a bishitá Malta den ménos ku 3 aña i e bishita aki tambe tabata pues den kuadro di e legislashon nobo di online gambling ku e minister tin algun aña kaba ta trahando riba dje.
Otro minister ku ta di biahe atrobe ta Hato ku di 2 yüni pa te ku 7 yüni ta na Miami, Florida kaminda e ta invitá komo oradó durante di e konferensia internashonal di Border Management & Tecnologies Summit Americas 2024”. Tambe Hato lo partisipá na un diskushon den grupo.
Hato tambe kaba di 15 pa 23 mei na Hulanda pa un bishita di trabou. Durante di e bishita aki el a hiba diferente kombersashon ku dignatarionan i hefenan di servisio ku ta di relevansia pa e ministerio di Hustisia.
Minister Ruisandro Cijntje, por último ta di bishita na Paramaribo, Sürnam di 3 pa 7 yüni. Esaki riba invitashon di minister di Sürnam enkargá ku Asuntunan di Eksterior, Asuntunan Internashonal i Koperashon Internashonal pa partisipá na e Suriname Energy, Oil and gas Summit and Exhibition.
Cijntje lo ta un di e oradónan durante e konferensia. Cijntje tabata di 26 pa 30 di mei huntu ku promé minister Gilmar ‘Pik’ Pisas na Antigua i Barbuda pa partisipá na e konferensia internashonal di “Small Islands Developing States”.
Banda di e ministernan tin un delegashon grandi di parlamento na Hulanda pa partisipá na reunion di IPKO ku ta kuminsá 7 yüni awor i ta dura te 10 yüni i tambe pa ta presente den reunion di parlamento hulandes awe na momento ku ta trata prologashon di un tratado fiskal entre Kòrsou i Malta i kambio di e areglo fiskal entre Kòrsou i Hulanda den kuadro di BEPS (“Base Erosion and Profit Shifting”).
Minister Larmonie-Cecilia na su turno tabata den eksterior un biaha mas pa motibunan privá. Tabata un bishita kòrtiku di 2 dia esta di 21 mei pa 2 di yüni.
Mirando ku dos di nan a keda invita, e pregunta ta ku si Korsou ta paga of esnan ku a invitanan? Tambe lo mi kier sa kiko ta e resultado i kon ta benefisia Korsou ku e biahenan aki.
Ta hopi biahe ta tin ku e gabinete aki i niunka mi no a mira ku Korsou a benefisia. Te dia awe ta warda e benefisio di e biahe pa Dubai. Banda di un folder i portret di Pisas ku Turban nada nada no a sali for di esei.