Total di 18 persona akusá den e kasonan di likidashon

WILLEMSTAD. - Djaweps dia 10 di yüni Korte Penal di Promé Instansia tabatin un veredikto kaminda ku huesnan ku ta forma parti di e tribunal a kontestá deseonan di abogadonan di 18 akusado relashoná ku e investigashon ku a haña e nòmber Eris. Ta trata di un investigashon kaminda ku tin 18 akusado ku ta forma parti di e klup di motersaikel Caloh Wagoh, ku ta keda sospechá di por lo ménos 5 likidashon, vários intento di likidashon i basta otro aktividat kriminal. Di e 18 akusadonan tin 4 yu di Kòrsou, 1 arubiano i 1 surinameño. Na opinion di Ministerio Públiko di Hulanda, durante e investigashon Eris, e sospechosonan prinsipal ta algun miembro di Caloh Wagoh. Nan ta keda sospechá di preparashon di vários likidashon. E último aki, un miembro di Caloh Wagoh mes a deklará na Ministerio Públiko ku e klup di motersaikel aki nan aktividatnan kriminal ta ekstremo i sin kompashon pa nan víktimanan.

Caloh Wagoh tabata traha pa mas ku un organisashon kriminal i nan ta traha riba òrdu di e organisashonnan aki. Segun Ministerio Públiko di Hulanda, t’asina ku e òrdunan di likidashon ta drenta serka e presidente di Caloh Wagoh, ku na su turno ta pasa esaki pa su komandonan sikario, di kua e aktividatnan kriminal tabata kruel.

For di kombersashonnan ku a haña riba telefònnan konfiská, a Sali na kla ku e kriminalnan aki ta papia di asesinato, meskos ku nan ta papia di un pan ku wòrs, esta asina simpel i fásil tabata papia di likidashon.

Un di nan dunadó di trabou di likidashon ta  tabata bin for di e “netwerk” kriminal di Ridouan T. ku ta sospechoso den investigashonnan grandi manera Eris i Merengo.

E investigashon riba pa loke ta trata Caloh Wagoh a kuminsá ora ku Justin Jap Tjong a keda likidá dia 31 di yanüari 2017.

Djaweps tras di lomba e tribunal di korte di promé instansia a konkluí algun aspekto den e investigashon, esta kon ta sigui ku proseso penal.

Abogadonan di 18 akusadonan dia 24 di desèmber 2020, a trese un seri di deseo dilanti pa e tribunal honra. Ta trata di deseonan pa tende testigunan, nan a pidi pa haña sierto dokumentunan i tambe nan a hasi petishon pa pone e akusadonan den libertat temporal.

Den nan desishon temporal, e tribunal a honra pa tende basta testigu den e proseso.

Pero pa loke ta trata e petishon pa libertat temporal, hues a rechasá tur, pa motibu ku e sospechonan ta hopi serio ainda i no tin indikashon ku aspektonan personal tin mas peso ku e interes di investigashon.

E kaso ta bai bèk hues komisario i no tin un fecha ainda ki dia esaki lo yega Korte Penal di promé instansia pa keda tratá.