WILLEMSTAD.- Manera ya e tim multidisiplinario a indiká for di durante siman tras di lomba, lo efektuá kontrolnan 0-toleransia durante wikènt ku a pasa.

For di djabièrnè anochi lat e kontrolnan a inisiá i riba e mesun dia ei e tim a kontrolá 22 establesimentu. E kontrolnan tabata den áreanan di Winstonchurchillweg, Dein, F.D Rooseveltweg, Cubaweg, Weg naar Hato, Kaminda Jose Liberia, Rooi Santu, Janthiel, Kaminda Hensley Meulens, Cocorie, Kaya Puresa, Weto, Caracasbaaiweg. Di e establesimentunan aki 2 a keda sera debí ku e.o no ta registrá kliente korektamente (apesar di a haña instrukshon wikènt siman pasa kaba), no ta puntra si a hasi tèst i tambe un di e establesimentunan a keda sera, debí ku su dokumentonan no ta na òrdu. Tambe riba djabièrnè a parti 12 prosèsverbal. 7 di e establesimentunan kontrolá tabata na òrdu.

Seguidamente djasabra a kontrolá 18 establesimentu den áreanan di Dein, Colombiaweg, Venezuelaweg, Schottegatweg, Zuiderzeestraat, Seru Fortunaweg, Wishi, Edisontraat, Veeris, Sportlaan, Weg Naar Hato, Frank Curiel Ballpark, Californiaweg, Welatinaweg, Cubaweg i tambe Lindberghweg. Di e establesimentunan aki 11 tabata na òrdu, a parti 5 prosèsverbal miéntras ku 7 di e establesimentunan kontrolá a keda sera. A sera e establesimentunan pa e.o, tokamentu di músika demasiado duru, yenamentu di bòter di alkohòl i tambe debí ku no ta registrá klientenan debidamente.

Úniko lokalidat ku mester a stòp hende di drenta den kuadro di seguridat tabata na Zanzibar na Jan Thiel, debí ku tabatin demasiado hende.

Aparte di esaki wikènt último e personal di VKC a supervisá kontrolnan na diferente sentro nokturno i klupnan kantu di laman. Segun Hefe di Departamentu di Inspekshon Ekonómiko Ronny Cornelis, e parti di supervishon di e personal di VKC a kana hopi. Esaki tabata di gran ayudo i sigur lo bai sigui kuné.