HULANDA.-Awe mainta hopi tempran a topa ku bastante bulto riba laman na Vlissingen, Hulanda. E loke ta konosí komo e kanal di nabegashon na Westerschelde tabata e área unda ku a topa nota di vários chaleko salbabida kolo fluoresente ta drif den laman. Manera indiká ta un kanal unda tin hopi moveshon di barkunan grandi ta move i e promé pensamentu a bai ku kisas lo tin hende a kai for di barku i hende lo tabatin nan chaleko salbabida bisti. Barkunan ku a yega mas serka a tuma nota ku no ta trata di hende sino mas bien bultonan pretu tur di teip i rondó di esakinan tabatin algun chaleko salbabiba. Opviamente a realisá ku e chalekonan tabata pa evitá ku e bultonan aki lo senk i bai fondo di laman.

Despues di un ratu mas barku a kuminsá bati alarma indikando ku nan tambe ta mirando mesun tipo di bultonan mara ku chaleko salbabiba kaminda nan ta nabegando.

Mesora a bati alarma i outoridatnan marítimo i duana a bai na kada un di e sitionan pa saka tur e bultonan for di laman. Despues a informa ku ta trata di 400 kilo di droga ku a keda konfiská di e manera aki na Vlissingen. E balor riba kaya ta por lo ménos 35.000 euro pa kilo.

Informashon adishonal ku EXTRA a logra kompilá ta indiká ku aparentemente tin barkunan ku a mira algun ‘piskadó’ tur na pretu anto den kanoa. Esei a hala atenshon debí ku den e área di Westerschelde tin hopi moveshon di barku grandi i banda di esei e koriente di laman ta hopi fuerte. Esei ta nifiká ku niun hende na tinu no ta pensa pa bai ku kanoa den e área ei pasobra hopi fásil koriente di laman por hala e kanoa bai kuné i debí na tantu moveshon di barkunan grandi esei ta hasi e situashon hopi peligroso pa bida di bende.