WILLEMSTAD.- Resientemente gobièrnu pa medio di Minister di Finansa a entregá e siguiente reportahe di maneho finansiero na Parlamento di Kòrsou. Den e reportahe aki e mandatario ta elaborá riba e desaroyonan finansiero di e aña di servisio aktual, pero tambe ta referí na e efektonan di COVID riba e aña ku a pasa. E ta bisa den e relato ku e efektonan di e brote di COVID-19 tin un influensia profundo riba aktividatnan ekonómiko mundialmente, i Kòrsou no ta un eksepshon.

Dor di seramentu di frontera tantu pa tráfiko aéreo komo marítimo, e siere obligatorio di un kantidat di empresa den diferente sektor komo konsekuensia di lockdown, distansia sosial i e koutela dje konsumidó ta e efektonan ku ta visibel pa Kòrsou den hopi sektor, i naturalmente den e sektor di turismo. Banda di esei tin hopi otro sektor ku ta konfrontando problema ku nan volúmen di benta, sea parsial òf kompletamente.

Naturalmente e efektonan aki tin implikashon riba e entradanan di gobièrnu. Pero teniendo kuenta ku esaki gobièrnu di Kòrsou den deliberashon ku Parlamento a hasi un apelashon riba artíkulo 25 di Rft, ya ku no opstante e esfuersonan di gobièrnu e défisitnan riba Servisio Ordinario pa aña 2020 ta pèrmisibel.

Desaroyonan finansiero 2021:

Di akuerdo ku e promé pronóstikonan di 2021 e Servisio Ordinario lo sera aña ku un défisit di 822.6 mion. Pero e pronóstiko aki ta a base di un vishon nobo. E Servisio Ordinario di e aktual periodo (yanüari) di reportahe pa aña di servisio 2021 ta sera ku un saldo negativo di 8.0 mion (pronóstiko 2.5 mion). E situashon dje obligashonnan ku ainda tin di kumpli kuné ta suma un montante di 148.2 mion. Den esaki tin di tuma na konsiderashon ku den sierto kasonan (p.e. supsidio i traspasonan) ya a registrá henter e suma dje obligashon finansiero den e sistema.

Pa loke ta pago di personal den e periodo ariba menshoná, menshon ta ser hasí di 27.2 mion, i si suma demas gastunan sosial e ta yega na 35.3 mion. Riba un base anual a presupuestá 420.8 mion florin.

Pa loke ta uso di produkto i servisionan e pronóstiko ta indiká un suma di 204.9 mion, i ta loke tambe a keda presupuestá.