Vershon polisial:

Kontinuando ku un investigashon relashoná ku un kaso di violashon di Lei di Arma di Kandela i Lei di Opio, Kuerpo Polisial konhuntamente ku Warda Kosta i Marina a tene un entrada hudisial.

Djabièrnè 9 di òktober 2020, alrededor di 07.00’or, a tene entrada hudisial na Scherpenheuvel kaminda a deskubrí un laboratorio ku ta prosesá mariwana.

Na e sitio polis a konfiská un total di 4437 mata di mariwana i a detené e hòmber G.J.R. nasé na Kòrsou di 39 aña di edat.

A presentá e sospechoso dilanti un fiskal ouksiliar ku a ordená su enkarselamentu pendiente di mas investigashon

WILLEMSTAD.-Manera indiká un ratu pasá, bastante polis i otro partnernan den hustisia ta den área di Skèrpènè relashoná ku un entrada hudisial ku ta tumando lugá ketu bai. Wardakosta ta brindando tremendo yudansa ku e helikòpter pa asina por sigui tur desaroyo for di laira. E plantashon di mariwana ta basta grandi.

Entrada hudisial tumando lugá awor aki

WILLEMSTAD.-EXTRA a tuma nota ku un Helikòpter di wardakosta ta bulando pa basta ratu kaba den e área pariba di Kòrsou. Djaleu a parse ku e Helikòpter lo ta bulando riba laman na kosta zùit òf den e área di Bapor Kibra/Koraal Specht.

Investigashon di EXTRA a indiká ku na e momentunan aki outoridatnan hudisial ta teniendo un entrada hudisial den área parti pariba di Kòrsou. Ta trata di un koperashon entre polis i otro partnernan den hustisia ku a uni forsa den e akshon aki. Ya kaba a konfiská un plantashon hopi grandi di mariwana. E akshon ta tumando lugá ketu bai. EXTRA tin detayenan mas amplio i e sitio eksakto pero ta opta pa duna outoridatnan espasio.