WILLEMSTAD.- MEO a bin ta hasi un bon trabou huntu ku demas disiplinanan den aparato gubernamental. MEO ta keda hasi su kontrolnan riba importashon di merkansia ilegal, valides di pèrmit etc. Den kuadro di esei ayera e tim di MEO a bai tira un kontrol na Parke Industrial Brievengat unda nan a topa ku un kargamentu serio di pampuna ku a ser importá di forma ilegal.

Den kombersashon ku sr. Ronnie Cornelis nos por a komprondé ku pampuna ta un dje produktonan ku ta ser produsí lokalmente, pues en prinsipio no ta permití su importashon sin mas. A bai kontrolá un kònteiner i aki a bin topa ku un kargamentu ilegal. Tabata no ménos ku 450 kilo di pampuna. Bou di leinan den pasado resien, un kargamentu manera esaki i kualke kargamentu konfiská lo a ser mandá landfill pa destrukshon. Sinembargo a hasi adaptashonnan den lei ku ta hasi posibel ku sierto produktonan/komestibel ku ser konfiská por bini na remarke pa keda repartí bou di kasnan di kuido sea pa hende grandi òf pa mucha.

Segun sr. Cornelis den e kaso aki den palabrashon i ku outorisashon di Minister di Desaroyo Ekonómiko a repartí e pampunanan bou di e siguiente instansianan:

Casa Cuna Berg Altena; Brasami; Krèsh Bai Bini; Krèsh Pedagogia; Casa Manita; Huize Rose Pellitier; GOG; Betesda; Heavenly Home; Grandinan Uni; Casa Cuna St. Helena i Kas di Grandinan na Habaai.

Segun sr. Cornelis, MEO lo sigui traha efisiente bou di e tim di maneho. Nan lo sigui traha dediká pa kombatí tur loke ta aktonan di ilegalidat i asina sirbi manera debe ser.