WILLEMSTAD.- Un akshon di departamentonan hudisial konhunto a kondusí ayera na detenshon di 6 hòmber i konfiskashon di hopi droga i tambe arma di kandela. Akshonnan den kuadro di e Actie Centrum Ondermijning Criminaliteit.(ACOC) a kontinuá i ayera djadumingu den oranan di mardugá personal di wardakosta, Polis i Duana, a tene un akshon  dirigí riba laman i riba tera en konekshon ku trafikashon di hende, droga i arma.

E akshonnan a tuma lugá riba laman den e área di zùit di Klein Kòrsou. E avion di Wardakosta den koperashon ku e Sentro di Reskate i Kordinashon, a detektá un boto sospechoso. Mesora e Super-RHIB  a ranka sali i a bin topa ku un boto ku tres persona riba dje. Na momentu ku a kontrolá den e boto a bin topa ku 81 kilo mas 775 gram  di kokaina i dos kilo i 140 gram di mariwana. A detené e tres hòmbernan sospechoso di nashonalidat venezolano, trese nan na e ‘steunpunt’ di Wardakosta na Parera. A konfiská tantu e lancha i e droga. A pasa e tres sospechosonan over pa departamento di narkótika di Polis ku ta kontinuá ku e investigashon.

Na mes momentu ku e akshon a tuma lugá na Klein Kòrsou, e avion Dash a detektá un otro lancha den bisindario di Bullenbaai. Riba indikashon di e Sentro di Reskate i Kordinashon, otro Super-RHIB a sali i a bin topa ku e lancha ku kuarentiun persona di nashonalidat venezolano abordo di kual trintisinku hòmber i  seis muhé. Mesora a trese e lancha na e ‘steunpunt’ na unda tur e kuarentiun personanan aki despues di a listra nan a pasa nan over pa Polis.

Kontinuando ku e investigashon riba tera den e kasonan aki,  polis a bai den área di Kaya Seru Machu kaminda e Tim di Mantenshon di Orden Públiko a para dos vehíkulo i a detené seis hòmber sospechoso, respektivamente:

F.O.Z.     di 64 aña

E.A.Z.     di 41 aña

J.A.L.     di 36 aña

M.D. di 26 aña

A.F.B.     di 16 aña

A.A.J.     di 19 aña

Tur nasé na Kòrsou. A presentá tur seis sospechoso dilanti di un Fiskal Ouksiliar. Polis a haña i konfiská dos rifel tambe polis a konfiská ámbos vehíkulo pa mas investigashon. E investigashon den e kaso aki ta kontinuá.