WILLEMSTAD.- dia 1 di mart 1976 EXTRA a subi kaya pa promé bia. Motornan tras di e idea di un matutino na papiamentu tabata Eddy Oleana (qepd) i Mike Oehlers (qepd). Nan a pone e fundeshi fuerte huntu ku direktor Ronny Irausquin ku un maneho finansiero serio, sostené pa akshonista i komisarionan, ku awe EXTRA ta kumpli 48 aña komo korant sólido. Esaki nos no por a logra sin e trabou inkansabel di kada un kolaboradó i e sosten di nos fiel lektornan rònt mundu. Na unda ku bo ta, EXTRA ta na bo alkanse i awor mas ku nunka. EXTRA a desaroyá i a kana sam sam ku teknologianan moderno, subiendo plataformanan digital. Nos no a keda solamente na papel, pero por lesa i skucha nos notisianan riba wèpsait, Facebook, Instagram i tambe Tik Tok. Tambe nos a desaroyá den notisia i informashonnan oudiovisual ku diferente programa di entrevista riba nos plataformanan digital. I tin kosnan grandi na kaminda. EXTRA ta rumbo pa 50 aña i e selebrashon lo start pronto. Keda pendiente i sigui nos riba Facebook, Instagram, Tik Tok, wèpsait i sigur buska bo korant tur dia na toko, supermerkado i na skinanan di hanchi pa keda na altura di tur loke ta pasa na Kòrsou i mundu.